Prolongacion di ceramento di frontera pa 3 of 6 luna mas

Dialuna mainta durante un conferencia di prensa, prome minister Evelyn Wever-Croes amplia tocante e situacion di Venezuela. El a bisa cu e situacion ta keda dificil, y lo renoba e ceramento di frontera, probablemente un prolongacion pa 6 luna mas. 

Bon Dia Aruba a puntra Wever-Croes cu si tin un bista pa ki tempo e frontera lo habri of ki solucion tin, pa motibo cu sistema di ESTA no ta cla ainda, of cuanto esaki lo ta tarda? Mirando cu e frontera cu Venezuela ta sigui cera. Comunidad Latino, den e caso aki persona di Venezuela, ta bisa cu nan kier bay bek nan pais, pero no sa con pa hacie.

Tambe tin persona cu ta biba na Aruba pa basta tempo y nan kier bay Venezuela pa bishita nan famia, of tin necesidad di algun documento cu nan mester y no por logra haci esaki. Wever-Croes a splica cu e decreto cu a cera frontera ta valido te cu dia 10 di september proximo y ta den proceso pa prolonga e decreto pa 3 of 6 luna mas. “Nos procedura no ta na ordo pa nos por bisa cu nos por habri frontera awo.”

Pa persona cu mester bay Venezuela, sea pa drecha nan papel of busca documento y no tin manera, el a bisa cu ta purbando di haya un manera pa yega na un solucion. Sinembargo, el a bisa cu e instancia pa yuda den asunto di Venezuela ta consulado di Venezuela. Un hende cu mester drecha su papel, ‘a traves di consulado bo mester haci’e’.

Segun Wever-Croes, ta bezig cu departamento di relacion exterior pa mira pa consulado tuma su parti pa yuda cu e asunto aki. “Nos a caba pa Aruba atende cu crisis ocasiona di otro pais. Nos ta atende mas miho cu ta posibel. No por perhudica e ciudadano cu ta akinan y si kier haci nan cos legalmente.”

E mandatario a expresa cu nan ta ricibi critica, anto ta purbando cu relacion exterior pa atende esaki cu e departamento di consulado di Venezuela.

Pa esunnan cu kier bay bek Venezuela, semper tin posibilidad di atende cu departamento di aviacion civil. Den e decreto cu a traha, a duna e posibel autorisacion na e director di departamento di aviacion pa aproba cierto vuelo.

“Tin algun vuelo cu ta saliendo cu Albatros. E ta bayendo Venezuela y esey kiermen tin posibilidad. Locual no ta posibel ta pa esunnan cu kier bishita nan cas anto bin bek. Pero pa tur esunnan cu kier bay bek, nan no por keda akinan, pero nan mester regla cu aerolinea.”

Pa finalisa, e mandatario a bisa cu cada problema cu enfrenta nan ta purba di trece un solucion na dje; sinembargo, apertura di frontera mes no ta algo cu lo pasa pronto.