ORANJESTAD – Jeanette Croes-Fingal ta e persona encarga cu hubileo pa famia den e comision 70 aniversario di Parokia kende a anuncia cu nan ta organisando un Dia di Famia, diasabra awo 27 di april, of Dia di Rey, cuminsando 11’or di mainta te cu 5’or atardi na Centro Caiquetio. E comision di hubileo di Parokia encarga cu Hubileo pa Famia lo tene un dia di famia combina cu Food Festival.

E meta di e dia aki ta primeramente pa duna oportunidad pa famianan bini hunto den un ambiente parokial. Tambe e fondonan recauda durante e programa lo ser destina pa yuda cubri e gastonan di e programa di hubileo di 70 Aniversario di Parokia Santa Filomena.

Pa 4 aña consecutivo parokia ta uza e fecha, ‘dia di Rey’ pa haci su fundraising. E aña aki nos ta dedica e dia aki na e hubileo di 70 aniversario di Parokia y cu un programa mas amplio.

Programa
E programa di e dia aki ta manera ta sigui:

-Entre 11’or mainta pa 2’or atardi tin e Foodfestival. Tur esunnan cu a cumpra carchi di cuminda na prebenta por pasa busca nan cuminda. Si resta carchi, nos lo bende na porta. Tambe nos ta bay tin nos mesa di bolo y cos dushi na benta y nos skina di koffie y te pa esunnan cu ta desea .

-For di 11’or te 3’or lo tin actividadnan pa muchanan por disfruta cu; pintamento, core den saco, e conocido grabbelton, cana riba “stelten”, pintamento di cara y siña traha obra di man.

-Pa esunnan amigo di e wega di domino; for di 1’or di merdia te cu 4’or atardi lo tin weganan amistoso. Lo bay tin copa pa esunnan campeon y sub campeon.

-Henter dia lo tin un vlooienmarkt pa esunnan cu ta gusta cumpra articulonan pa coleccion.

Animacion lo ta entre otro di caha di orgel, ” Mi Adorada” di sr. Marin cu lo deleita tur presente cu su musica cultural y cu oportunidad pa rek e pianan bailando un of mas piesa.

Tambe lo tin un bar y cushina bon surti pa esunnan cu ta desea di bebe of come algo.

For di awor e Comision Hubileo 70 Aniversario di Parokia Santa Filomena ta invita henter pueblo Aruba y Paradera en particular pa bini y pasa un dushi dia di famia riba Dia di Rey na Centro Caiquetio for di 11’or mainta pa 5’or atardi.