Ayera diadomingo pa 7or di mainta, pueblo di Aruba a registra e prome blackout di aña 2024 cu a tene un duracion di aproximadamente 3 ora y mey na unda WEB Aruba N.V a sigura cu esaki tabata debi na un fayo den motor den planta RECIP.

A traves di un comunicado, nan a señala cu alrededor di 7or di mainta, di dia 21 di januari, a surgi un fayo den planta di RECIP na WEB, cual a resulta den un reaccion den cadena. Esaki a conduci na un Blackout, un interupcion di coriente pa e isla completo.

Personal di WEB mesora a drenta accion pa isola e causa pa por recupera coriente mas pronto posibel. E proceso aki mester a bay hopi controla pa e planta no cay atrobe, mirando e situacion delicado. Pa 10:33 AM a logra reestablece suministro di coriente 100% pa ELMAR y consecuentemente pa isla henter.

Como parti di WEB su maneho, ta sigui un ‘root cause’ analisis pa averigua e causa di e fayo cu a causa e blackout.

Despues cu a descubri e fayo y cu a logra controla esaki, a cuminsa recupera suministro di coriente alrededor di 8or di mainta pa e area di Balashi, Santa Cruz y bisindario. Despues a sigui e otro areanan di e isla.

E secuencia den recuperacion di suministro di coriente pa e diferente areanan ta depende di stabilidad di e red di coriente y demanda di coriente na e momento ey. Tambe ta duna prioridad na suministro di coriente pa areanan di aeropuerto y hospital pa motibo di nan importancia vital pa e isla.

Pa 10:33 AM ekipo di produccion di WEB a logra reestablece coriente completo na e sub-stationnan di ELMAR rond Aruba.

Na aňa 2023 a surgi un blackout na januari y un brownout na december. Tumando esaki na cuenta, WEB a cumpli cu un total di 99.93% di tempo cu 100% di demanda di ELMAR di e isla.

Nan ta sigura cu hunto cu nan empleadonan, gerencia ta haci su maximo esfuerso pa limita e cantidadnan di blackout den 2024 y mas den futuro.

“Di parti di gerencia y empleadonan di WEB Aruba, ta ofrece disculpa pa e inconveniencia causa pa e blackout di 21 di januari, cual a logra recupera den un periodo di 3 ora y mey. Gerencia tin comprension pa e iritacion causa cu e interupcion aki. Empleadonan di WEB su departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di blackout mas tanto posibel y pa mantene comunidad informa. Un biaha mas WEB su gradicimento pa e comprension y pasenshi.” WEB Aruba N.V a finalisa.

Aeropuerto Internacional Reina Beatrix informa cu su operacionnan a bay back na normalidad pa 9.20 di mainta.

Di otro banda, minister encarga den e parti di Energia, Glenbert Croes riba su Facebook page a publica un mensahe indicando cu “Blackouts mester a pasa pa pasado cu e inversion grandi hasí Mi meta ta pa sigura pa Aruba cu di berdad blackouts nunca mas ripiti. Nos no ta eynan ainda pero e compromiso/accion ta wordo haci.”

E malcontento pa e post publica pa minister Croes no a tarda hopi na unda algun usuario hasta a puntra “ken ta para responsabel cu loke a daña of kima door di coriente?” segun un di nan a puntra.

Awe mainta, pa 9or WEB Aruba N.V ta bay tene un conferencia di prensa pa splica mas tocante loke a sucede ayera.

Ni un luna a pasa di e brownout di 28 di december
 Mester recorda cu dia 28 di december 2023, a surgi un cortocircuito den un di e transformadornan den planta di WEB lo cual a conduci na un Brown out, un interupcion di coriente pa diferente area di nos isla.

Debi na e fayo aki e sistema di pompnan cu ta pomp awa pa Aruba a perde coriente tambe y consecuentemente e presion di awa a cay pa varios parti di Aruba.

Nan a informa cu personal di WEB mesora a drenta accion pa isola e causa pa por recupera coriente mas pronto posibel, na unda e proceso aki mester a bay hopi controla pa e planta no cay atrobe, mirando e situacion delicado.

Igualmente a indica cu esaki no tin relacion cu falta di mantencion pero si nan ta bay haci un rute cost analisis pa asina nan por haya sa kico tabata e motibo di pakico e brownout aki a sucede pa bin cu recomendacionnan pa por remedi’e.

“Lo cual mi por bisa si cu e transformers ta anticua y nos tin’e den plan pa cambia nan den añanan cu ta bin,” CEO Interino Veromar  Werleman a expresa dia 29 di december 2023.

Tambe el a menciona cu pa e problema no por a bira mas grandi, nan a busca e causa, nan a isola esey pa sigura cu ora subi of suministra back no ta bay tin e mesun problema

Aruba no a yega di experiencia un black out aña pasa manera a sucede na aña 2022 caminda a sucede tres biaha, un dia 9 di juni 2022 na unda a surgi un storing den planta di WEB, cual a causa un blackout. Otro dia 22 di augustus 2022 cu tabata debi na interupcion den produccion di coriente den planta di WEB, un dia 5 di november 2022 e cual tambe tabata debi na un fayo den e planta di WEB Aruba NV y awor e prome di aña 2024 cu a tuma luga ayera 21 di januari.

Potretnan ta di Facebook page di N.V ELMAR y WEB N.V Aruba.