Minister di Salubridad Publico, Dangui Oduber a bisa cu gobierno a presupuesta e actividad di plantacion y exportacion di cannabis pa uzo medicinal. “Kiermen esaki ta algo sigur den aña 2020, gobierno lo bay haya su entradanan pa cu esaki,” e hoben mandatario a sigura.
E concepto nobo aki cu ta aparece den e presupuesto 2020 cu lo wordo trata na mita di februari venidero, lo mester genera entrada pa asina pais Aruba por cumpli cu norma a base di e protocol cu pais Aruba a firma cu Hulanda y supervisa pa CAft.
Pero pa bin cune, mester a cambia prome e ley pa permiti e plantacion y exportacion di cannabis pa uzo medicinal. El a splica cu esun cu ta haya e licencia mester yega na un acuerdo cu un compania farmaceutico pa traha e producto final medicinal.
Pero ainda e cambio di ley aki mester wordo aproba den Conseho di Minister. Despues e cambio di ley aki mester cana su trayecto na departamento Huridico, Raad van Advies y despues bin gobierno bek pa wordo entrega oficialmente na Parlamento, unda e ta wordo trata den un reunion publico. Eynan den un debate publico lo wordo determina si parlamento ta bay di acuerdo of no pa e cultivacion di cannabis tuma luga na Aruba.
Oduber a bisa cu gobierno su pensamento ta pa bay duna licencia pa e cunukero di cannabis. Pero prome nan lo bin cu mas informacion, ya cu ainda e ley mes no a wordo entrega.
Pero unabes cu esaki lo wordo entrega oficialmente, gobierno lo bin cu tur informacion den cuadro di transparencia, segun e mandatario. Den e informacion aki nan lo bay splica kico ta e proceso pa bin na remarca pa haya un licencia pa plantacion y exportacion di cannabis. E meta tras di esaki ta -segun e minister- cu e producto final lo ta uno medicinal.
