19aug. JM, Escolar (1).jpg

Pa pais Aruba un formacion y educacion escolar ta sumamente importante. Un pais sin educacion y formacion ta un pais dificil pa desaroya. Ta sumamente importante pa cada miembro di e comunidad sa skirbi, lesa conta y papia. E persona cu tin un inhabilidad pa motibo di nacemento of un accidente tambe mester por haya tur clase di oportunidad den enseñansa pa por siña tur e aspectonan basico pa por funciona den e comunidad aki.

Ta un tradicion na Aruba cu aña escolar ta cuminsa cu yen di problema y ta cera cu yen di problema y discusion. E solucionnan ta varia segun e problema presenta su mes. Nos por cay den discusion ey pero awor aki nos ta enfoca riba e alumno cu awe ta presenta na scol. Nos fotografo a pasa na diferente scol pa duna nos lectornan un bista positivo di e prome dia di scol. Scol den bida di nos tur ta forma un parti hopi importante. Educacion y enseñansa ta forma e base firme pa e futuro di nos hendenan. Ta pe motibo ey ta di suma importancia cu scol y cas, mayornan y educadornan forma un laso fuerte pa por brinda nos muchanan un miho educacion y formacion.

Nos ta desea tur alumno, studiante , mayornan maestronan un aña escolar productivo pa por hiba e desaroyo di nos yiunan na un siguiente nivel.