Minister di Enseñansa y Deporte Sr. Endy Croes a reuni cu Sra. Josephine Albertus y tambe Sra. Tricia Ramou Everon di SIMAR diamars atardi na Bestuurskantoor.
Segun un comunicado di prensa, Croes a splica algun dia atras cu su deseo ta pa reestablece trankilidad y paz den e veld di enseñansa y pa logra esaki lo traha cu portanan habri pa scucha tur stakeholders pa e bienestar general. Croes no a bay den detaye di e reunion, pero a cubri diferente puntonan di preocupacion. Alabes a splica cu lo traha mesora riba solucionnan practico pa den tempo corto por tin trankilidad riba algun di e topiconan cu trece na mesa.
Di su banda, SIMAR a comparti ‘cu e reunion a bay den un atmosfera positivo’.
“Unda cu nos a tuma e oportunidad pa intercambia riba diferente topiconan den enseñansa.” Segun un comunicado di e sindicato, “SIMAR ta contento di tende cu nos Minister di Enseñansa su portanan ta habri pa nos veld di enseñansa y pa cuminsa sondea posibilidadnan pa trece trankilidad den enseñansa. Nos kier termina gradiciendo Minister di Enseñansa pa a atende nos riba corto plaso y cu conhuntamente nos por traha na bienestar di enseñansa.”
