Ayera durante un conferencia di prensa di gobierno, prome minister demisionario, Evelyn Wever-Croes a duna informacion riba e diferente forma di sosten di emergencia cu varios instancia, entre nan gobierno, ta duna pa esnan mas afecta pa e pandemia di Covid-19.

Despues di comenta riba e enfoke di gobierno riba vacunacion, Wever-Croes a bisa cu tambe ta enfoca riba e parti di recuperacion economico. Maske ta mustra cu e parti di salubridad publico ta domina, mirando e cifranan abao di casonan activo di Covid-19, fayecidonan y hospitalisacion, segun Wever-Croes esaki no ta e caso pa e aspecto economico. “Ainda tin hopi hende cu ta depende di FASE, y nos lo keda mantene FASE tambe. FASE no ta un proyecto cu Hulanda ta financia, e ta un proyecto cu gobierno di Aruba mes ta financia, hunto cu e cortamento di salario cu tin den sector publico y semi-publico, y esey ta bay keda na su luga.”

Igualmente, Wever-Croes a informa cu gobierno ta trahando riba un proyecto caminda cu FASE ta bay converti den algo otro, ‘pero esey no ta cla ainda’. “En todo caso FASE lo sigui existi, esaki no tin niun motibo pa kit’ele aworaki, y p’esey mi kier reitera, cu no mester tin preocupacion cu FASE ta bay stop.”

Pa loke ta trata subsidio di salario, esaki tambe ta bay keda ‘pa esnan cu mester di dje’. “Cada luna nos ta mira cu mas doño di trabao ta para riba nan mesun pia financieramente y no ta haci uso di subsidio di salario.” El a comenta cu un hotel a gradici gobierno pa yuda cu subsidio di salario, cu a yuda 130 pa 140 persona tabata depende riba subsidio di salario, pero e luna aki pa prome luna nan no tabatin mester di e sosten financiero aki mas. Wever-Croes a celebra e tipo di recuperacion aki cu ta un indicacion cu tin un grado di recuperacion economico ta tumando luga. Sinembargo, mirando cu recuperacion economico ainda ta na mas o menos mita, e programa di subsidio di salario no lo termina. “Pues subsidio di salario lo continua te na fin di e aña aki pa tur esnan cu tin mester di dje. Pero berdad nos ta mira un recuperacion – di 55% manera nos ta compronde cu e ta – y esey ta pone cu companianan no ta us’e mas.”

Otro forma di ayudo relaciona cu e crisis di pandemia ta e asistencia di cuminda. Wever-Croes a indica cu antes esaki tabata administra pa Cruz Cora pero awo e ta bay wordo administra pa gobierno, ya cu Cruz Cora a indica cu no por continua cune. E programa di asistencia di cuminda tabata controversial despues cu varios reporte a bin dilanti den medionan di comunicacion local indicando cu por tin fraude of maluso di e programa di asistencia di cuminda.

Sinembargo, mirando e necesidad cu ainda ta existi den comunidad, Wever-Croes a indica cu gobierno ta continua e programa. “Gobierno ta sigui cune, y dia 7 di juni, tur esnan cu ta bin na remarca pa pakete di cuminda por registra na Fundacion Pa Nos Comunidad, pa asina nan por bin na remarca pa haya pakete di cuminda entrante 1 di juli, pa tur cos sigui manera e tabata”, Wever-Croes a declara. Ademas, el a comenta cu Hulanda a bay di acuerdo pa sigui financia e proyecto aki di pakete di cuminda pa 3 of 4 luna mas. Despues, si ta necesario, Aruba mes lo haci su mes responsabel pa continua e programa aki door di fia placa di Hulanda, pero manera Wever-Croes a indica, durante e tres pa cuatro luna aki ta ricibi e placa pa asistencia di cuminda como un regalo for di Hulanda.

Cu esaki, Wever-Croes a conclui indicando cu tur programa di ayudo di crisis relaciona cu e pandemia di Covid-19 na Aruba lo mira un continuacion, mientras cu Aruba ta yega na un normalisacion economico den futuro.