(AFP) – Prome minister Britanico, Keir Starmer a bisa dialuna cu ta necesario implementa proteccionnan mas fuerte pa mucha riba rednan social, añadiendo cu e pais ta studiando e prohibicion pionero di Australia pa menor di 16 aña.
Starmer a bisa durante un conferencia di prensa cu “ningun opcion no ta for di mesa” ora a puntr’e tocante posibel restriccionnan riba uso di rednan social pa hoben, añadiendo cu e tambe ta preocupa pa e cantidad di tempo cu mucha chikito ta pasa dilanti di pantaya.
Politiconan na Reino Uni, Francia y otro paisnan ta considerando restriccionnan despues cu luna pasa Australia a bira e prome pais na mundo pa prohibi menor di 16 aña di usa plataforma di rednan social manera Instagram, Facebook, TikTok y YouTube.
“Mi ta kere cu nos mester haci mas pa proteha mucha, y pa esey nos ta mira un gama amplio di opcionnan y ta bisa cu ningun opcion no ta for di mesa,” Starmer a declara. Segun reportahenan, e prome minister ta sperando mas evidencia riba e efecto di e prohibicion di Australia prome cu e considera medidanan similar.
Mas o menos 60 parlamentario di partido Labor di Starmer a firma un carta abierto diadomingo, urgiendo e prome minister pa cambia curso y blokia acceso pa menor di 16 aña, citando preocupacion riba daño na salud mental di hoben.
“Gobiernonan consecutivo a haci masha tiki pa proteha mucha chikito contra consecuencia di plataforma di rednan social no regula y adictivo,” e legisladornan a bisa.
Lider di partido Conservador di oposicion, Kemi Badenoch, tambe a instiga Starmer pa bay mas leu riba e tema y sostene un prohibicion.
“Mi kier pa Keir Starmer haci un cambio total — y prohibi rednan social pa menor di 16 aña na Reino Uni,” Badenoch a skirbi den ‘Mail on Sunday’.
Segun medio Britanico, un revision transpartidario pa un prohibicion similar na esun di Australia probablemente lo ser vota e siman aki den ‘House of Lords’— e camber ariba di parlamento Britanico.
Francia tambe ta debati actualmente leynan pa prohibi rednan social pa menor di 15 aña, incluyendo un propuesta sosteni door di presidente Emmanuel Macron.
