Ayera, Prome Minister di Sint Maarten, Luc Mercelina a yega Aruba y a keda ricibi pa Prome Minister di Aruba, mr. Mike Eman. Durante su yegada, Premier Mercelina a expresa su aprecio pa e invitacion y a enfatisa riba e importancia pa fortalece amistad y cooperacion entre e islanan di Reino Hulandes.
Den un comunicado di prensa, premier Eman a expresa cu e bishita no solamente ta un encuentro simbolico, sino tambe un paso importante pa traha hunto riba reto comun cu islanan chikito ta enfrenta den un mundo dinamico. El a indica cu ta mas cu 15 aña a pasa desde cu Prome Minister Mercelina su ultimo bishita na Aruba.
“E Common Good Conference ta ofrece un espacio oportuno pa pensa y dialoga riba futuro comparti,” segun e comunicado.
E minister a hiba hunto cu Prome Minister Eman e idea cu, den pasado, islanan a concentra hopi riba sobrevivencia individual y demostracion di independencia. Sin embargo, segun Prome Minister Mercelina, e realidad actual ta mustra cu colaboracion y aliansa regional ta esencial pa enfrenta retonan global manera cambio climatico, cambio geopolitico y vulnerabilidad economico cu ta afecta islanan chikito.
Premier Mercelina a enfatisa cu Aruba, Sint Maarten y e otro islanan di e region ta forma parti di un grupo di Small Island Developing States (SIDS) cu desafionan comun y necesidad pa comparti conocemento, experiencia y recurso pa logra sostenibilidad y resiliencia pa futuro.
Segun e Premier Eman, e Common Good Conference ta un bon paso den e direccion corecto, creando un plataforma pa comparti loke ta e bon comun y con por uza esaki pa mehora calidad di bida di nos pueblonan.
Pa finalisa Prome Minister Mercelina su mensahe, expresando su honor pa ta presente na Aruba y su deseo pa algun dia di dialogo intenso por ta fructifero durante e conferencia. Alabes, el a invita Prome Minister Eman y Aruba pa sigui fortalece relacion cu Sint Maarten, destacando cu hopi logro di Aruba tabata posibel pa medio di cooperacion, solidaridad y contribucion di ciudadano, incluyendo hende di Sint Maarten cu a forma parti di e historia y desaroyo di Aruba.
