E bishita di Prome Minister mr. Mike Eman na Hulanda tin un obhetivo significativo pa nos comunidad y Eman ta haciendo tur esfuerso pa logra cosnan grandi pa Aruba.

Asina Premier Eman a haci un bishita diabierna cerca Sandor Gaastra, Secretaris Generaal di Ministerio di Asunto Economico y Clima na Hulanda.

Prome Minister Eman a comparti e diverso plannan pero tambe ta sondea con por desaroya e tereno di refineria. Tin estudionan intensivo pa haci prome cu haci cualkier movecion riba e tereno di refineria, pero esaki no ta kita afo cu e trabao ta bay ta hopi grandi pa sanea y desaroya e area den futuro. Hulanda ta dispuesto pa yuda Aruba mirando cu nan tin e capacidad y varios entidad cu experticio riba e tereno aki.

Segun Gaastra, mirando tur locual ta pasando rond mundo, ta hopi importante pa tin un bon relacion cu tur pais, pero specialmente cu e partnernan den Reino Hulandes.

Recientemente, Parlamentario Mike de Meza, a presenta un mocion den Parlamento den cual a dicidi cu mester drenta un otro epoca pa e area di refineria. Esey ta nifica cu mester sanea e area por completo y busca pa desaroya esaki cu otro actividad comercial economico. E proceso aki no ta facil y ta rekeri hopi experticio y profesionalismo y transparencia. Cu sosten cu a ricibi for di Hulanda pa e proyectonan PPP di Green Corridor y Watty Vos Boulevard, a haya for di Rijkswaterstaat di Hulanda expertonan cu a yuda formula tur detaye di con mester atende cu proyectonan di e embergadura asina.

Banda di Haskoning, cu ta un compania experto cu ta acesora den e tipo di temanan asina, tecnologicamente ta bisa’bo kico por y ta evalua con ta haci e limpiesa di e area. Ademas ta busca sosten riba nivel di legislacion y di organisacion di destahonan publico di e tamaño aki den cual mester garantisa tur transparencia pa haya e miho oferta.

Awe nos ta para dilanti otro oportunidad grandi pa desaroyo nobo pa tanto San Nicolas como pa Aruba completo. E area tin un potencial pa Aruba su economia, si por realisa desaroyo moderno y limpi cu lo trece mas empleo, tanto den e desaroyo nobo como durante e periodo di limpiesa.

Kico lo haci den a area no ta difini ainda, pesey ta sondea experticio di Hulanda pa yuda cu e desaroyo di e area grandi aki. Tin hopi oportunidad pa desaroya un cantidad di actividad comercial economico cu lo trece desaroyo pa San Nicolas y Aruba completo.

Aruba a perde hopi tempo cu contratonan cu companianan cu no tin e capacidad pa maneha nada riba e area ey. No tin tempo mas pa traha cu companianan amateur y p’esey ta necesario pa busca sosten cu companianan di nivel halto.

Ademas di companianan manera Haskoning, PWC, y KPMG y otro entidadnan grandi, Aruba kier tin un capa di “governance” di hendenan cu capacidad cu sa con huridicamente ta hinca tipo di contratonan di destahonan asina grandi den otro pa garantisa un proceso di nivel halto.