Prome Minister Evelyn Wever-Croes como hefe di gobierno no kier delanta mucho riba kico lo por ta e desenlace di e dos ronda di e reunion di minister Marisol Lopez-Tromp den Parlamento mañan.

Un situacion cu a surgi den seno di partido POR y cu a sigui escala te hasta cu a yega di afecta operacion normal di gobierno. Esta despues cu e lider di POR y minister di Husticia, Andin Bikker a abstene di participa den e reunionnan di Conseho di Minister.

Minister presidente a afirma cu e impasse entre Lopez-Tromp y POR a wordo aclaria y cu e reunion di conseho di minister por a continua diabierna ultimo. E no sa kico lo por resulta den e reunion di mañan den Parlamento. E ta haya dificil pa bisa kico lo por resulta, ya cu e no ta envolvi den e proceso di Parlamento mes, sino di gobierno.

Mediacion

Premier Wever-Croes a bisa cu despues cu Parlamento a pidie pa intermedia den e situacion aki, y despues di algun deliberacion, e por constata cu den seno di partido POR tin e confiansa den Lopez-Tromp.

Un di su prome pregunta na Lopez-Tromp tabata si e kier keda den POR, y si e kier keda minister. Y pa ambos pregunta el a haya un ‘si’ for di e mandatario en cuestion. Tambe brindando su mediacion den e situacion aki, el a puntra e otro banda, kiermen partido POR, cu tambe tabata dispuesto pa sigui traha cu e minister. “Mi ta constata cu e confiansa ta reestableci,” el a bisa.

Dia 24 di juli debi na e situacion cu a surgi, conseho di minister a dicidi di kita e cartera di Lopez-Tromp y nan a dun’e otro funcion te ora cu e impasse aki keda resolvi. Pero awor cu e impasse a wordo soluciona, e ta sigui cu e cartera bek.

Igualmente minister president a laga sa cu Bikker a informa su persona como cabes di conseho di minister, cu e tabata dispuesto pa sigui participa den e reunion di conseho aki, hunto cu Lopez-Tromp.

Diabierna nan a continua cu e reunion di conseho di minister cu tabatin un luna cu no tabata tuma luga pa motibo di e impasse aki. El a clarifica cu no tur biaha tur minister ta presente den e reunion di conseho di minister. Actualmente tin minister cu ta recuperando di kebrante di salud, pero nan tabatin conseho di minister cu un mayoria diabierna ultimo.

Casonan y accion

Ayera Minister Presidente a referi na e topico di integridad, mirando cu durante e prome tanda di e reunion aki di dia 31 di juli ultimo, Lopez-Tromp a trece algun asunto controversial relaciona cu casonan di iregularidad den e aparato publico, particularmente den e departamentonan cu ta resorta bou su cartera. Entre nan el a referi na contratonan cu no a cera conforme ley di Comptabilidad. Documentonan riba areglonan di huur di edificio y tambe documentonan riba personanan cu a haci actonan coruptivo of iregular den departamentonan y a haya pasonan disciplinario nan contra.

E ta kere cu Parlamento tin un rol pa haci den e reunion di mañan. Sinembargo e ta haya cu si e tabata den e mesun situacion di Sra. Lopez-Tromp kende a bay trece dilanti diferente cos, prome cos cu Parlamento tin cu puntr’e ta: Kico e lo haci cu tur informacion ey?

Prome Minister a bay mas den detaye riba e pregunta di Bon Dia Aruba, y el a bisa cu si el a compronde minister Lopez-Tromp bon, ya e minister aki a trece mayoria di e casonan cu el a trece den Parlamento cerca su persona. “No tur mi tabata conoce. Pero mayoria di nan,” el a bisa.

Pero ora cu el a confronta e mandatario aki riba kico el a haci cu e casonan aki, e mandatario a bis’e cu el a investiga y tambe a entrega keho. Minister president su impresion ta cu mayoria di cos cu Sra. Lopez-Tromp a trece dilanti ta cosnan cu a tuma accion riba nan caba. Of e ta tumando accion riba nan. “Si e no ta tuma accion, e ora mi ta cay aden…” el a bisa. Pero e no ta kere cu esaki ta necesario.

Evaluando e contesta aki for di minister di Infrastructura, el a bisa cu e pasonan a wordo tuma caba. Te hasta tabatin algun punto cu Lopez-Tromp no a tuma paso ainda, y premier Wever-Croes mes a tuma e pasonan necesario, el a declara ayera. El a insisti pa haya algun rapport cu e mes a manda pa Ministerio Publico (OM).

Pues e ta haya cu e puntonan cu Lopez-Tromp a trece dilanti durante e prome tanda den Parlamento, gran mayoria di nan, e mandatario en cuestion mes a tuma accion caba. Of e mester tuma e accion necesario riba su mes, tambe pa medio di investigacion forensico of pa medio di OM. E ta kere cu aunke e ta na cabes di conseho di minister, e no ta un babysitter.

E ta haya cu cada minister tin nan responsabilidad ministerial, y tur otro minister mester respeta y lag’e traha, segun su responsabilidad. Y esaki tabata e ‘conseho’ cu minister presidente a duna na Lopez-Tromp ora cu el a papia cune, y e no tin niun duda cu e lo hacie.