Diabierna atardi, Prome Minister Evelyn Wever-Croes a ricibi e manifiesto di un grupo di maestro cu a presenta na Bestuurskantoor. Wever-Croes a expresa cu e vocero di maestronan, na forma respetuoso, a trece padilanti e preocupacionnan di e maestronan cu algun desaroyo di enseñansa y a haci e peticion pa no corta den enseñansa. 

“Mi a splik’e cu e situacion financiero cu nos a hereda a pone cu mester a tuma pasonan serio pa drecha e situacion, pa despues haci e inversionnan necesario den enseñansa. Ohala cu nos a haya e pais den miho circunstancianan, lo nos a inverti den enseñansa manera mester ta. Nos a palabra cu mi lo invit’e hunto cu un delegacion mas chikito, pa delibera riba e diferente puntonan. Mi ta sigur cu den dialogo, nos por sali afo”, Wever-Croes a duna di conoce segun un comunicado di gobierno.

Den e comunicado, Wever-Croes a indica cu e maestronan a bin trece nan preocupacionnan na Gobierno y esey ta nan derecho y no necesariamente lo tabata un accion politico.

“Mi ta aprecia e forma con nos maestronan ta lucha pa enseñansa y mi ta contento cu nan tin e oportunidad pa trece nan preocupacionnan sin cu nan ta wordo menasa cu ‘riot commando’.

Despues cu mi a lesa e manifiesto den tur trankilidad, mi por a conclui cu nan a vocifera nan puntonan zakelijk y bon. Mi ta aprecia esey”, Wever-Croes a enfatisa.

Segun e comunicado, e mandatario principal di nos pais a enfatisa cu e ta tuma e preocupacionnan di e maestronan hopi na serio. “Como mama, mi tin un respet grandi pa tur maestro cu ta yuda nos educa nos yiunan. Kico cu mi por haci pa yuda den enseñansa, mi lo haci’e”.

Wever-Croes a indica cu e realidad financiero di nos pais ta serio y cu mester tene cuenta cune. Esaki, segun Wever-Croes no tin un ‘easy way out’ di e herencia financiero di gobierno anterior. Sinembargo, e bon noticia ta cu tin un ‘way out’ si y Gobierno ta trahando riba esaki. Pa saca Aruba di e problemanan financiero y duna enseñansa e inversion cu e merece. A pesar di e situacion financiero, Aruba ta invertiendo 5.7% di nos GDP na enseñansa. 17% di presupuesto di pais Aruba ta bay na enseñansa, segun e comunicado.

“Y nos meta ta, pa unabes nos sali di e crisis financiero, inverti mas den enseñansa, den e maestronan y den innovacion den enseñansa”, Wever-Croes a duna di conoce.

El a indica cu ya varios di e puntonan cu a trece dilanti, a wordo atendi caba. Algo por ta a bay robes den e comunicacion entre e grupo di maestro aki y Wever-Croes, sinembargo mayoria tema di e cartanan di diferente grupo cu a entrega ya a haya atencion. Wever-Croes a ricibi carta di SPO cu a wordo atendi y soluciona, y nan a wordo informa. A ricibi carta di Tra’i Merdia cu a wordo atendi y ta casi full soluciona y esunnan concerni a wordo informa. A ricibi carta di MDC y decisionnan necesario a wordo tuma, y awor ta den proceso di wordo ehecuta. Aki tambe esunnan concerni a wordo informa caba.

“Pues nos ta trahando pa atende cu e preocupacionnan den enseñansa y lo duna e maestronan e atencion debido. Na final di dia, mi ta hopi contento di mira cu e cultura di miedo a cuminsa disparce den nos pais, cu hendenan ta sinti nan liber pa manifesta nan malcontento, y cu nan por haci esaki sin wordo menasa, of agredi pa riot commando y pa cacho, cu lo ta un situacion full contrario bou di e gobierno anterior”, Wever-Croes a termina ta bisa.

LEAVE A REPLY

Please enter your comment!
Please enter your name here