E necesidad pa reduci gasto di personal di Gobierno no ta un tema nobo y no a bin pa motibo di e crisis economico cu e pandemia a trece cu n’e. E tabata un problema cu IMF, Banco Central, Camara di Comercio di Aruba, ATIA tur a señala pa hopi decada caba. Y Raymond Knops den su ultimo conferencia di prensa den e calidad di Secretario di Estado pa Asuntonan di Reino a bisa cu e reduccion di gasto publico y reforma di aparato publico ta basa riba palabracionnan cu a haci cu Aruba na 2018, unda a discuti e punto pa baha e gasto di personal na un nivel sostenibel.

Aki tambe ta conta cu no por saca mas placa cu locual no tin. Gabinete Wever Croes a tuma paso y algun a keda den e landspakket. Conseho di Minister di Reino a menciona e condicionnan y ta locual ta mara Aruba tambe. Y ta keda evalua cada periodo di e tranche di likides. Na November lo mester evalua kico a logra,” Knops a bisa riba e pregunta con riba e cambio di e Landsverordening Materieel Ambtenarenrecht, LMA.

Di su banda Prome Minister Evelyn Wever Croes a bisa cu e mes no sa di tur e detayenan di e cambionan cu mester bin den e LMA. “Locual mi sa ta cu riba maneho y costo di personal tin palabracionnan haci den e landspakket, y e investigacionnan cu mester tuma luga, pa yega na un maneho di personal eficiente pa asina por baha gasto. Kico e detayenan mes ta mi no por bisa.”

Carta sindicato

Sindicatonan SIMAR, SEPPA, SPA y SADA a manda un carta pa Prome Minister Wever Croes pa participa na e negociacionnan den e landspakket, particularmente riba e tema di posicion huridico di nan miembronan y e LMA. “Nos no ta den e fase pa duna mas contenido na e punto aki. A palabra cu sindicatonan cu awor ta tumando luga investigacionnan y asina cu nan ta cla, y tin sugerencia pa cambio, e ora ey lo envolvi e sindicatonan,” Evelyn Wever Croes a bisa. Prome Minister a lanta un comision pa sinta cu sindicatonan pa splica e proceso di e landspakket. “Tin espacio pa deliberacion, pero na final mester yega na un aparato eficiente cu menos gasto di personal.”

Cambio LMA

E pregunta sinembargo ta keda si Gobierno a cuminza cu e proceso pa haci cambio den e LMA manera e agenda di ehecucion a indica. “Ora nos sa kico e investigacion ta bisa, nos lo por determina cua ta e cambionan cu mester bin na e LMA.” Wever Croes mes ta kere cu ta ora cu ta bin cambio y e sa esaki a base di su propio experiencia. “Como hefe di Servicio di Belasting pa 13 aña, mi tabata kier a wak cambio den e LMA. Pues asina cu ta cla cua capitulo di e LMA mester cambia, lo informa e sindicatonan, pero finalmente goberna ta nifica tuma decision,” Prome Minister a bisa.

Sinembargo, manera Bon Dia Aruba a señala den su editorial ayera, expertonan ta mustra cu no mester di cambia e LMA pa us’e como instrumento pa exigi eficiencia. Problema ta cu hopi director den pasado a haci uso di LMA pa retira ambtenaarnan cu no ta funcciona, pero a haya nan mes confronta cu e empleado tin proteccion di un mandatario y consequentemente, e Director no por sigui cu su proceso.

Sra. Wever Croes no a atende cu e ultimo punto pero a enfatisa cu e no sa e detayenan di cua capitulo di LMA mester cambia. “Pero locual si mi por bisa cu mi lo profundisa den dje y nos por bay mas den detaye despues.”

Tampoco e prome mandatario por bisa cua ta e meta pa cambia e LMA y cu cuanto e gastonan publico y particularmente esunnan di salario di personal mester baha. “ No tin benchmarks (red. punto di referencia) ni sumanan menciona. Pero Gobierno ta den un situacion dificil, Ya caba a corta 12.6 porciento den salario. E pregunta ta kico mas mester haci pa sigui baha e gastonan. Claro, si presupuesto di 2022 mester ta sin deficit manera CAft a bisa, e ta nifica cu mester baha gasto. Y nos lo papia riba e tema aki (cu sindicatonan),” Evelyn Wever Croes a bisa.