Prome Minister, Evelyn Wever-Croes: ‘Integridad ta keda prioridad’

Den un conferencia di prensa, Minister Presidente Evelyn Wever-Croes (MEP) a papia tocante e firmamento di Memorandum Of Understanding cu Stichting Deugdelijk Bestuur Aruba, representa pa Armand Hessels.

Dos siman pasa a tuma luga e firmamento di e acuerdo. E fundacion, hunto cu gobierno, ta bay haci un ‘National Integrity System Assessment’ (Evaluacion di Sistema di Integridad Nacional), cu ta un scan di integridad di e situacion actual na Aruba.

E scan aki lo ta pa sector priva, como tambe pa sector publico, anto e lo revela den ki situacion Aruba ta para y kico ta e riesgo mas grandi. A base di esey, e mandatario a bisa cu a traha un plan strategico nacional di integridad.

“Parti cu mas a hala mi atencion ta cu sector priva tambe a duna di su parti pa tambe nos por logra construi e fundeshi di integridad di nos pais. Pasobra e scan strategico nacional di integridad ta bay ta financia pa gobierno pa mita y otro mita pa stichting”, el a splica.

Sector priva y sector publico lo uni forsa pa combati corupcion, pa asina trece integridad bek. E mandatario tambe a bisa cu Banco Central a manda un invitacion pa presentacion di ‘Corporate Governance Code’, e regla di integridad cu mester conta pa compania estatal y sector priva.

El a bisa cu Banco Central a tuma e rol pa cuminsa cu iniciativa. “Nos ta yegando unda nos tin cu yega riba e tereno di integridad. Bureau Integriteit Aruba ta institui, pronto nos lo tin suficiente hende ta traha eynan pa cuminsa tuma e prome reporte y e prome melding”, Wever-Croes a expresa.

E Camara di Integridad ta traha hunto cu Conseho di Minister. Esaki ta bira e di tres pilar pa e fundeshi di integridad, cu ta e ‘corporate governance code’, segun e mandatario. Pa cera e pilar ta e scan hunto cu sector priva y lo mustra cua ta area cu mester enfoca mas.

Pa finalisa, e mandatario a splica cu e prome dos aña a bay den planificacion y pensa kico ta e miho idea, con pa hink’e den otro. “E di dos parti ta gobernacion, pa bay ehecuta y percura cu integridad ta keda prioridad number un di nos gobierno.”