Diahuebs 19 di mei, Gobierno di Aruba a organisa e prome encuentro cu hefenan di departamento pa loke ta trata Gabinete Wever-Croes II. Esaki a wordo haci despues cu e presupuesto a wordo aproba y cu e puntonan di maneho a wordo determina hunto cu e presupuesto.

E encuentro aki a conta cu un sala yen cu mas di 200 persona cu ta hefenan di departamento/ directornan di departamento di Gobierno.

E personanan cu ta encarga cu presupuesto na cada departamento y esnan encarga cu maneho di personal tambe a wordo invita. Prome Minister Evelyn Wever-Croes a duna di conoce cu e presentacionnan tabata mas dirigi riba aspecto financiero, unda y con Aruba ta para awor.

Dhr. Derrick Werleman: Departamento di Finansas

Director di Departamento di Finansas a trece dilanti e importancia pa tur hefe di departamento sa cu Aruba no a sali di e crisis ainda y p’esey ainda no por bay bek na e nivelnan di presupuesto conoci hopi prome cu Covid. Nos tin cu bay bek na e nivelnan mas reduci.

Omaira Lares: Departamento di Recurso Humano

Director di Departamento di Recurso Humano a trece padilanti e retonan cu tin riba maneho di personal, con e proceso ta hinca den otro y con ta mehorando den cuadro di e landspakket. Tambe el a toca e tema di ziekteverzuim (AO) den gobierno cu ta 8.2% den e prome 4 lunanan aki. Sector priva ta poco menos cu 5%. “Nos no por hustifica e 8.2% cu ta asina mas halto den Gobierno y nos a splica hefennan di departamento con nan por yuda nos den esaki tambe”, Prome Minister a duna di conoce.

Indra Zandaam: Landspakket

Tabata tin un presentacion di señora Indra Zandaam tocante e Landspakket y con esaki ta hinca den otro pa tur hefe di departamento compronde con e proceduranan ta y con bo ta haci palabracion den un agenda y despues pa raporta con el a bay y con Gobierno ta den cumplimento cu tur cos. Tambe con e-Government ta bay yuda den tur e procesonan aki.

Marielle Meaux: Bureau Integriteit Aruba

Finalmente nos tabata tin un presentacion di señora Meuax di Bureau Integriteit Aruba cu a duna e “integriteitskaart”, e mapa di integridad cu ta indica con ta bay yega na mehora integridad den departamentonan di Gobierno y kico hefenan di departamento por haci pa asina por crea mas conscientisacion.

Minister di Finasa Xiomara Maduro

Minister di Finansa a presenta e cuadro financiero pa aña 2022 y a duna un bista riba con Aruba ta para awo financieramente.

Prome Minister Evelyn Wever-Croes:

Den su presentacion, prome Minister a splica cu na e momento aki Gobierno ta preparando Presupuesto 2023 cu mester ta cla e luna aki internamente door di Ministerraad pa Gobierno mande otro luna pa CFT pa e bin bek y bay Raad van Advies pa despues entreg’e na Parlamento dia prome di september. Prome Minister a expresa cu e trabou aki ta hibando su tempo debido cu e meta pa keda cla cu ne manera plania.

“Mi mester bisa si cu e hefenan di departamento a keda contento cu e informacionnan ricibi apesar cu no ta tur cos ta bon noticia pero tur informacion a wordo comparti cu transparencia y esey ta un parti hopi positivo.

Mi ta gradici tur e mas di 200 persona cu a mustra hopi interes pa participa na e encuentro aki. Mi a gradici e hefenan di departamento pasobra nan ta esunnan cu a lucha pa wanta Aruba riba pia. Sector publico durante pandemia a traha asina duro y ta nan hunto cu nan ekipo di empleadonan publico lo yuda pa hiba Aruba padilanti sakando nos di e pandemia”, Prome Minister a expresa.