Prome minister Evelyn Wever-Croes tocante Mediaraad; “Gabinete Wever-Croes no ta esun cu ta bay bin cu regla pa eleva cierto puntonan di prensa”

Mediaraad ta un tema cu a bin dilanti durante relato anual 2021 di Ministerio di Asuntonan General, pa motibo cu maneho di medionan di comunicacion ta cay bao e ministerio aki, pero ta minister di Geoffrey Wever encarga cu e cartera di Comunicacion ta esun encarga cu e Mediaraad.

Segun un comunicado di prensa di gobierno mes, nan kier garantisa un futuro unda prensa por sigui ehecuta nan profesion na un manera independiente, sin influencia di gobierno, na beneficio di pueblo di Aruba. Aunke manera ta conoci pa henter comunidad, tin cierto medionan di comunicacion cu tin influencianan politico, algo cu no ta etico den periodismo.

E tema aki a bin dilanti durante un conferencia di prensa di prome minister Evelyn Wever-Croes, unda el a destaca cu na Aruba no tin un ley cu ta bisa cu si un persona ta gaña e por wordo keha na corte. “Den e caso si ta ofende un hende di tal forma cu ta trece duda riba tur cos di dje si, pero si ta djis un rumor, cu ta considera como shisheria, bo no por entrega un keho pa para esey”, el a expresa.

Ademas, el a comenta cu ta hopi importante pa cada ciudadano por ta mas critico y no cay pa cualkier mentira y keda compartie. “Gabinete Wever-Croes no ta esun cu ta bay bin cu regla pa eleva cierto puntonan den prensa cu tin un nivel abao, esey no ta un trabao di un gobierno y nos no ta bay mete den esey. Loke nos deseo ta pa bin si cu un cuadro legal di norma pa e cual prensa ta atene su mes na dje, p’esey nos a pensa riba e Mediaraad”, prome minister a declara.

Mediaraad ta un conseho di hendenan di prensa unda lo tin representantenan di prensa skirbi, di prensa televisa y di otro categorianan, unda hunto nan lo defini kico si ta posibel y kico no ta posibel, y den esey lo traha cuadronan pa purba cu tur prensa ta tene nan mes na e normanan cu a nan ta stipula.

“Como gobierno ami no por bay hacie, ami no por bisa kico si y kico no pasobra mi ta mete den libertad di prensa y mi no ta bay haci esey” prome minister a sigura.

Igualmente el a pidi comunidad pa ta mas critico, no yegando na nivel di insulto, difamacion of discriminacion, pa motibo cu libertad di expresion ta existi pero e tin su limitenan. Prome minister mes a expresa cu su persona como politico ta haya fastioso ora cu e ta wordo ofendi na moda hopi vulgar, pero esey ta algo personal, esey ta afecta otro prensa cu kier haci su trabao na un manera profesional.

“Ami ta kere cu ta algo cu tin cu regula su mes. Gobierno por yuda y ta facilita tambe pa bin cu un cuadro legal pa bin cu Mediaraad, pero e trabao materia di kico ta e normanan ta di e Mediaraad mes, no di gobierno”, el a bisa.

Pa finalisa, el a sigura minister Geoffrey Wever ta trahando riba esey y prome cu lo presenta cualkier proyecto di ley e tin cu papia cu stakeholders, pa asina locual cu ta wordo presenta ta acepta pa otro hende.