(NLTimes) Prome Minister Hulandes, Dick Schoof a bisa diaranson cu e kier cera un acuerdo comercial cu Merca cu lo elimina tarifa, despues di un acuerdo riba aumento di gasto di defensa den e cumbre di NATO.
“Pa mi, e tarifa ideal ta cero porciento,” Schoof a bisa periodista prome cu un cumbre di Union Europeo. El a pidi pa un separacion entre asuntonan di comercio y negociacion di defensa, bisando, “E dos asunto aki mester ser mira independientemente.”
Schoof a confirma cu el a transmiti e posicion aki directamente na presidente di Merca Donald Trump. “Pa Hulanda — un pais cu den esencia ta existi pa gracia di comercio y comercio habri — realmente no mester tin tarifa at all, solamente comercio habri,” el a bisa.
E tensionnan entre UE y Merca ta escalando segun cu Trump ta menasa cu tarifanan di castigo riba Spaña pa su fracaso pa compromete su mes na e meta nobo di gasto di defensa di NATO di 5 porciento di GDP. Spaña ta e unico miembro di NATO cu no ta alinea cu e meta, loke a pone Trump adverti di posibel consecuencianan comercial pa Spaña, cu segun informe lo afecta henter UE.
“Mi a tende e comentario ey na e conferencia di prensa di Presidente Trump,” Schoof a bisa ora a puntr’e tocante e menasa. “Pero ta, naturalmente, mucho trempan pa esey.”
Negociacionnan riba e tarifanan di Merca riba productonan di UE ta keda andando. Trump ya a subi tur e tarifanan existente na 10 porciento y ta menasa di bay mas halto. UE a keda envolvi den combersacionnan intenso cu Washington den un intento pa preveni escalacion. E fecha limite actual pa yega na un acuerdo comercial ta 9 di juli proximo.
Si no yega na un acuerdo pa e tempo ey y Merca aumenta tarifanan, segun informe, UE ta prepara pa impone impuesto di importacion di represaya riba mercancia Mericano. Ta bisa cu un pakete di contesta substancial ta na su lugar caba.
