(NLTimes) – Prome Minister di Hulanda, Rob Jetten, y su prometido Nicolás Keenan ta sperando un baby pa primavera di 2027. E pareha lo bira tata cu ayudo di un mama substituto, segun Keenan a anuncia riba rednan social.
Jetten ta e prome Premier Hulandes desde Segunda Guera Mundial cu lo haya un yiu mientras e ta ocupa e funcion di Prome Minister. Durante e ultimo decadanan, mayoria di e Prome Ministernan Hulandes ya tabata tata prome cu nan a asumi e cargo. Ademas, Jetten ta e prome Prome Minister Hulandes cu ta abiertamente homosexual y tambe e prome cu lo haya un yiu via un mama substituto.
Segun un declaracion di partido D66, e embaraso a ser organisa cu ayudo di un pareha amigo cu ya tin yiu. Tanto e donante di ovulo manera e mama substituto ta Hulandes. E acuerdo no tin un caracter comercial, ya cu tur dos muhe ta conocir di Jetten y Keenan y a ofrece nan ayudo pa haci e deseo di e futuro tatanan bira realidad.
Den un publicacion riba Instagram, Nicolás Keenan a comparti su alegria pa e yegada di e baby na 2027. El a expresa su gratitud na e donante di ovulo, na e mama substituto Lisa y na famianan di tur dos, enfatisando cu sin nan ayudo esaki lo no tabata posibel. Keenan a comparti e mensahe na Hulandes, Spaño y Ingles.
Prome Minister Jetten tambe a expresa su agradecimento, indicando cu danki na dos muhe special, nan tin awor e oportunidad pa realisa nan gran soño di bira tata.
Jetten a confirma cu tanto e mama substituto como e baby ta bon di salud, locual, segun e, ta e aspecto mas importante na e momento aki. El a haci un yamado urgente pa respeta privacidad di tur persona envolvi.
E mama substituto, Lisa, tambe a comparti un declaracion via D66. El a conta cu el a crece den un hogar yen di amor y actualmente e mes tin un famia maraviyoso. Segun Lisa, cu sosten incondicional di nan sernan stima, e oportunidad pa yuda nan bon amigonan realisa nan deseo di bira tata ta algo sumamente special.
