DEN HAAG (AP) – Hulanda su prome minister mas largo sirbiendo den historia, esta Ruud Lubber a fayece ayera na un edad di 78 aña.
Gobierno di Hulanda a anuncia cu sr. Lubber a muri na Rotterdam den presencia di su casa Ria y 3 yiu. Causa di su morto no a wordo divulga.
E prome minister actual Mark Rutte a elogia sr. Lubber como un estadista kende a carga Hulanda durante temponan economico dificil. “Cu su conocemento amplio y experiencia y su creatividad inmenso, e sa con pa busca un solucion pa cada problema”, asina sr. Rutta a comenta riba su Facebook.
Sr. Lubber a lidera un gobernacion conservativo entre 1982 pa 1994. Su maneho tabata den liña di su coleganan grandi e tempo ey, esta presidente Ronald Reagan di Merca y prome minister Margaret Thatcher di Inglatera. El a corta den e sistema social di Hulanda, convenciendo e sindicatonan e tempo ey pa limita nan demanda y asina logra crecemento economico pa añanan. E tempo ey el a ricibi critico pero en general nan a elogie, entre otro pa limita crecemento di salario en cambio pa cuponan di trabou. Y tambe pa corta den gastonan di gobierno como cu e ta haya cu e tempo ey gobierno a crece demasiado y asina afectando e saludo di Hulanda su economia. “Mas mercado, menos gobierno”, tabata su lema.
Sr. Lubber tabata e lider di e partido politico CDA. E lider actual Sybrand Buma ta describie como cu un lider ‘kende su escogencianan no a hacie mucho popular sinembargo nan tabata necesario pa saca Hulanda for di e crisis’.
Sexual harassment
E politico tambe a drenta e seno internacional sinembargo su imagen politico a sufri hopi na 2005 pa motibo cu mester a baha como UN High Commissioner pa refugiadonan pa motibo di un scandal di sexual harassment. El a mantene su inocencia te na e momento cu el a tuma su retiro. E caso a bin dilanti ora Cynthia Brzak, un empleado di UNHCR a entrega un keho, acusando sr. Lubbers cu el a touch e den un forma inmoral. Sr. Lubbers a bisa cu e tabata un ‘gesto amical’. El a bringa pa mas cu un aña pa salba su reputacion pero un investigacion interno a descubri un ‘patrono di mal conducta sexual’ di su parti.
Guera friu
Sr. Lubber tambe ta conoci pa e asunto di raketnan nuclear na 1984. NATO a exigi dado momento cu Hulanda lo staciona e raketnan pero un gran parti di e populacion tabata contra. E prome minister finalmente a acepta e demanda di NATO pero a hunga un wega di tactica di tardanza, unda e ta bisa cu Hulanda lo hacie si Rusia tambe lo pone mas raket. Tempo a pasa y na final e problema a bira irelevante como cu Rusia a cuminsa papia di reduci e cantidad di raketnan nuclear.
