Ayera den oranan di merdia den un conferencia di prensa extraordinario prome minister Mike Eman a informa comunidad tocante e situacion entre Merca y Venezuela. Segun e mandatario na e momentonan, a base di informacion oficial ricibi, no mester tin panico y comunidad por keda trankil.

Prome minister Eman a informa cu ayera mainta el a tene un sesion cu Departamento di Relacionnan Exterior, hunto cu Departamento di Seguridad, Veiligheidsdienst di Aruba y hunto

cu ATA pa por evalua e situacion cu gobierno a bin ta monitor ya pa basta siman caba, pero ya a yega den un otro fase na e momento aki hunto cu conseheronan di Gabinete di Asuntonan General.

El a splica cu despues di e sesion ey tabatin un Conseho di Minister extraordinario pa asina comparti e analisis y informacion cu nan ta hayando for di e diferente ministerionan di Reino Hulandes, cu cual, el a enfatisa, Aruba ta den comunicacion frecuentemente pa asina por tin un bista hopi cla di e situacion y tambe con e ta bay desaroya eventualmente den e dianan cu ta bin.

El a sigui splica cu despues di esey tabatin un sesion special den Parlamento di Aruba cu durante cual a intercambia cu parlamento tocante e informacion ricibi y locual gobierno ta haciendo pa ta na altura di e situacion.

Prome minister Eman a informa cu tanto ministerio di Relacionnan Exterior como Veiligheidsdienst den e ultimo dianan tabata den contacto intensivo cu tanto ministerio di Relacionnan Exterior di Hulanda como embahada na Washington caminda e minister plenipotenciario tambe ta presente.

El a indica cu den e funcion aki e minister plenipotenciario tin acceso na informacionnan cu e embahada di Reino na Washington tin como tambe acceso na Departamento di Estado di Merca caminda e minister plenipotenciario a haya informacion cu ta importante pa gobierno por sa kico realmente ta sucediendo na e momentonan aki

Adicionalmente e mandatario a informa cu nan tabatin contacto tambe cu e embahada di Reino na Venezuela y a base di locual nos tin na informacion ey gobierno a papia tambe cu Sr. Walter Hansen, comandante di e Zeemacht di Reino na e parti di Caribe Hulandes pa asina tin un bon bista riba con e desaroyonan ta den e region.

“Nos sa continuamente tin hopi cos ta pasando den mundo, tin diferente area caminda tin diferencianan di pensamento of opinion cu ta crea incertidumbre y pa nos e ta importante pa ta al tanto di cada un y con nan por impacta den nos region directamente. Pa e motibo ey nos ta den contacto continuo cu tur e ministerionan cu por duna nos informacion,” prome minister Eman a remarca.

El a splica cu Veiligheidsdienst ta haci un evaluacion tambe di con mester interpreta e informacionnan cu nan ta haya y na mesun momento, el a indica, gobierno a haci tambe un analisis di kico esaki por nifica pa e trankilidad, seguridad y turismo di e isla.

Prome minister Eman a informa, a base di informacion cu gobierno tin cu por comparti na e momentonan aki ta cu manera cu Merca a anuncia nan tin dos fregata militar cu ta biniendo den direccion di Caribe. El a remarca cu e contrario na loke a ser raporta den otro medionan, e dos fregatanan militar no a yega Corsou ainda, pero ta na caminda y tin un meta, manera cu Merca mes a anuncia, cual ta pa fortifica e parti di combatimento di narcotrafico. Presidente Trump kier ta aumenta e vigilancia y e forsanan cu cual Merca ta combati narcotrafico.

“Pa e motibo ey nos a haya periodo aki caminda tin hopi inkietud y hopi speculacion pero locual tin na e momento aki ta e un informacion ey di e dos fregatanan cu ta biniendo den direccion di Caribe. Nos tin cu keda monitorea di cerca con e ta desaroya, pero nos tin cu respeta tambe e diferente factornan cu tin di acuerdonan pa locual ta trata con ta vigila e area di Caribe. Nos sa cu tin acuerdonan tambe di nos mes cu Merca,” e mandatario a señala.

El a splica cu paisnan manera Merca, Hulanda, Francia entre otro, pa hopi aña caba ta usa e forsanan militar pa fortifica e combatimento di droga, pues no ta trata di algo cu ta inusual.

“Den e sentido ey locual ta sucediendo no ta nada for di normal, cu e excepcion naturalmente di un presencia cu ta ser anuncia cu cierto metanan hopi cla. Pero e hecho cu tin instrumentonan militar ta ser usa pa combati droga ta algo cu a ser dicidi hopi aña pasa caba den cual Reino Hulandes y Wardacosta tambe ta tuma un postura tambe den e mesun area di Caribe aki,” el a agrega.

Prome minister Eman a urgi comunidad pa keda trankil y alabes a enfatisa cu si tin cualkier motibo cu esaki por bay den otro direccion, gobierno ta monitor continuamente y lo tey pa duna comunidad informacion riba con nan ta mira e situacion y haci analisis di locual ta sucediendo

Pa loke ta trata e anuncio di presidente di Venezuela Nicolas Maduro cu ta bay pone cantidad di militar na costa di Venezuela, miembro di prensa a puntra prome minister Eman si na e Embahada Venezolano na Aruba tin algun mensahe cu a ser transmiti pa gobierno di Aruba.

Contestando e pregunta, e prome mandatario a splica cu relacionnan exterior ta un tema segun statuut cu ta responsabilidad di Reino Hulandes. El a remarca cu a pesar di esaki, Aruba tin hopi oportunidad pa duna su pensamentonan riba e accento cu ta pone den relacionnan exterior, vooral den e region”. Ora nos tin cualkier deseo pa mobilisa un deseo den cualkier pais den region nos tin acceso na embahadornan di Reino.

El a sigui splica cu na momento cu tin cualkier tension Aruba mester ta un tiki mas cauteloso y un tiki mas reserva como den cuanto Aruba ta bay drenta e liñanan di comunicacion pasobra cualkier mal comprendemento por conduci na situacionnan cu no deseabel. “E ora ey bo ta palabra mas cla kico e liña di comunicacion lo ta pa loke ta trata relacionnan exterior,” el a agrega.

Pa loke ta trata e reunion cu Parlamento di Aruba, prome minister Eman a indica cu e parlamentarionan tabata hopi atento pa e situacion y tabatin hopi pregunta hopi al caso y pa loke ta trata si diferente scenario tuma luga con prepara Aruba ta. El a splica cu Gabinete AVP-FUTURO no lo specula riba scenarionan pasobra Merca a bisa hopi cla cu esaki ta un proyecto cu meta hopi concreto. “Por purba analisa hopi cos rond di dje, pero mester tum’e na e balor di locual ta ser bisa na e momentonan aki, Mi a sinti den tur fraccion, un atencion sincero pa e situacion y tambe un apoyo sincero pa gobierno por tuma e liderazgo pa cana y guia pais Aruba door di situacionnan asina,” el a enfatisa.