Ayera den oranan di atardi Prome Minister, Evelyn Wever-Croes a yama un rueda di prensa extraordinario den sala VIP di Aeropuerto Internacional Reina Beatrix, pa informa tocante su biahe pa Hulanda pa negocia riba e 5% di salario cu e trahadonan publico lo mester a haya back e luna aki.
Wever-Croes ta splica cu Aruba ta den un impasse cu Hulanda ariba e tema di e pago di 5% na empleadonan publico y esunnan cu ta traha den fundacionnan di gobierno. El a menciona cu e motibo di e biahe inicialmente ta personal, vakantie, pero mirando e situacion e lo tene reunion pa purba yega na un solucion.
Na su yegada na Hulanda awe mes e tin reunion cu Secretario di Estado, Alexandra van Huffelen y despues di esey e tin reunion di Conseho di Minister di Aruba, cual e lo haci via Zoom y despues lo comunica kico ta e resultado di e reunion.
Manera ta conoci, e impasse ta basa ariba e hecho cu segun Hulanda, Aruba no por paga e 5% back e fin di luna aki pasobra Aruba no a cumpli cu rekisitonan, ya cu Parlamento di Aruba a adapta e ley di normering top inkomens, cu ta regula salarionan top den companianan estatal.
Wever-Croes a remarca cu e no ta comparti e mesun opinion. “Nos ta kere cu akinan bo ta papiando di un democracia parlamentario cu ta algo cu no solamente Aruba tin, pero Hulanda tambe, cu parlamento ta liber pa haci su trabaonan, cu ningun gobierno ta mas cu parlamento, parlamento tin e ultimo palabra”, el a indica.
El a splica cu si pone esey un banda mes y mira e proporcionalidad di kico e situacion ta, Hulanda ta bisa pasobra tin shete persona ta gana riba 329 mil florin cu ta traha den e companianan estatal, e resto di empleadonan cu ta traha pa gobierno, pa fundacionnan cu ta wordo subsidia pa gobierno y companianan estatal no por haya e 5% back. “Mi no ta kere cu e ponencia ey por keda. E ta un situacion cu no ta facil y tin deliberacionnan fuerte ta tuma luga”.
Prome Minister a menciona cu nan lo trata tambe e tema di aanwijzing, aunke el a indica cu riba e tema di aanwijzing tabatin palabracionnan caba. Segun el a splica nan a reuni siman pasa y Aruba tin te prome cu e siguiente sesion di rijksministerraad, fin di augustus, pa yega na otro.
El a indica cu e lo reuni tambe cu CAft na Hulanda, y lo mustra kico tur Gobierno di Aruba ta haciendo den e cambio di presupuesto cu tur biaha despues di recess nan ta entrega na Parlamento di Aruba y den esey nan lo sigui e deliberacionnan.
Wever-Croes a subraya cu ainda nan no a yega na e punto di consecuencianan, pa loke ta e punto di e pago di 5% y nan ta den fase di deliberacion ainda. El a indica cu Gobierno di Aruba a prepara pa e pago delanta, sinembargo nan kier haci e pago den bon consulta cu Hulanda y esey lo wordo dicidi mañan.
Ariba e topico di aanwijzing, el a enfatisa cu como Gobierno di Aruba semper nan ta purba evita cu ta yega asina leu, pa motibo cu e ta causa inseguridad cerca inversionistanan y e ta trece nerviosismo. “Nos lo papia di dje y mi lo splik’e con avansa nos ta di yega na e deficit cu CAft tambe ta haya cu ta permisibel pa e aña aki”, el a agrega.
Pa loke ta trata presupuesto y entrada y gastonan, Prome Minister a splica cu e ta bayendo hopi bon y economia a bay miho cu locual nan a premira na comienso di aña. El a sigui splica cu Departamento di Impuesto ta haciendo accionnan pa cobra sumanan atrasa di impuesto mas lihe y ta poniendo mas presion. “Mi ta kere berdad prome cu nos bay bati na porta di henter e comunidad pa paga un belasting nobo, esnan cu no a paga belasting tin cu paga loke cu nan debe”, el a enfatisa.
Segun el a indica, e tin entendi cu tur e accionnan e aña aki ta trece 20 miyon florin extra den caha di Aruba. Esey ta e parti di entrada.
E parti di gasto, Wever-Croes ta splica cu e gastonan di goederen en diensten cu ta di e departamentonan di gobierno – no di e ministernan, pasobra e goederen en diensten di e ministernan ta hopi abao y a sigui baha – tin departamento ta bisa cu nan no por corta mas den nan gasto di departamento pasobra esaki lo por afecta operacion y servicio. Pero e proyeccion ta cu nan por baha e gasto tambe cu alrededor di 20 miyon florin.
El a remarca cu e diferencia entre Aruba y CAft ta alrededor di 120 miyon, pero e indicacion ta cu Gobierno di Aruba por yega hopi mas cerca, no e 120 miyon completo, pero hopi mas cerca. Cu e mensahe ey, el a comenta, e ta bay y e ta bay cu tur e documentonan tambe pa entrega.
“Eynan mi ta kere ta importante pa compronde otro. Aruba ta den progreso, nos ta den recuperacion y no ta tur ora bo por haci loke buki ta bisa pa bo baha bo deficit. Tin biaha e buki teoretico ta bisa bo tin cu corta bo gasto, bo tin cu aumenta entrada, pero bo tin cu wak Aruba tambe”, Prime Minister a subraya.
El a menciona cu e tabatin un reunion hopi crucial cu gremio comercial na bestuurskantoor recientemente durante cual e gremio comercial a trece pa dilanti nan preocupacionnan y Wever-Croes ta kere nan por ta riba e mesun liña cu nan. “Mi ta compronde nan preocupacionnan completamente, nos ta comparti nan y esey a yuda mi tambe den e argumentonan cu mi tin cu trece pa dilanti na mesa”, el a enfatisa.
Den caso cu Hulanda keda riba su decision, Prome Minister a splica cu durante Conseho di Minister di Aruba nan lo mester dicidi lo bay pasa, pero el a remarca cu na final di dia nan ta gobernantenan di Aruba y nan tin un responsabilidad pa Aruba.
No ta un secreto cu e situacion na Aruba ta dificil. Apenas e isla a cuminsa sali un poco di e efectonan di e pandemia, pero aworaki e guera di Ucrania a yega y a aumenta prijs di flete, a aumenta prijs di gasolin y WEB y Elmar tambe ta pone presion pa hisa prijs di awa y coriente, pasobra e guera na Ucrania a pone cu e prijs di e combustibel cu nan ta busca a aumenta.
Prome Minister a expresa cu ta yega un momento cu como gobernante nan por wordo teni responsable pa no tuma e decisionnan corecto di e pais. El a splica cu e kiermen cu por yega un momento cu esunnan cu tin derecho riba e placa, e empleadonan publico, por pone Gobierno di Aruba responsable pa no paga nan.
“Na e momentonan aki nos ta bisa nos como gobierno ta sumamente importante pa paga esaki na empleadonan publico cu a entrega desde 1 di mei 2020, sagradamente, prome cu e ley a pasa, boluntariamente nan a hacie. Aworaki cu Aruba ta den recuperacion, turismo ta bayendo hopi bon, economia no a pick up ainda, pero nos ta bay p’e, ta momento pa nos duna e ambtenaarnan y esunnan cu ta traha den fundacionnan di gobierno nan 5%”, el a señala.
