Siman pasa, Team FUTURA, a bishita varios scol na Aruba pa presenta ‘SDG Board Game’, esaki ta e wega di SDG cu ta siña muchanan tocante e 17 metanan di Desaroyo Sostenibel cu Nacionnan Uni a stipula pa 2030 pa crea un miho mundo.
FUTURA ta encarga cu ehecuta e plan di innovacion di gobierno pa desaroya un futuro di Aruba hancra den innovacion cu e ser humano central. Desde su existencia, FUTURA a lansa diferente proyecto y iniciativa riba e area di innovacion na diferente scol y luganan pa duna muchanan mas conocemento den e area di innovacion incluyendo e Metanan di Desaroyo Sostenibel. Prome Minister Evelyn Wever-Croes a participa na e presentacion cu a wordo duna na alumnonan di klas 6 di St. Aloysius School.
4 aña pasa, e Asamblea General a stipula un agenda 2030 pa transforma nos mundo. Esaki despues cu a realisa cu progreso den un pais mester bay man den man cu bienestar di e ciudadano. Aki na Aruba tambe, nos gobierno a pone e ser humano central y den esaki e SDG ta core manera un linea cora den nos programa. E meta final: inclusion, caminda ningun hende ta wordo laga atras.
Pa sigura exito di e SDGs pa Aruba, nos mester inclui nos muchanan. Cuminsa na scolnan pa introduci SDGs na nos generacion cu lo dirigi nos mundo den futuro cu innovacion y nan ta esunnan cu pa 2030 mester ta miho para tambe den conocemento di e Metanan di Desaroyo Sostenibel.
E presentacion di e wega di SDG a wordo gusta pa tanto muchanan como e docentenan di e scolnan. Muchanan a keda hopi contento y impresiona di e manera cu FUTURA a duna e presentacion y sigur nan lo mira riba un otro proyecto di FUTURA sea na scolnan of na e diferente localidadnan cu FUTURA ta bishita. Prome Minister Evelyn Wever-Croes a gradici FUTURA pa e presentacionnan aki na diferente scolnan. Hunto nos ta logra e meta proponi pa 2030.
