Prome Purple Friday den Caribe teni na Colegio Arubano

Ayera tabata e prome Purple Friday cu a yega di tuma luga den henter Caribe, segun un docente, tumando luga na e scol Colegio Arubano y organisa pa e scol su GSA Network (Gender and Sexuality Network). Cu e evento historico aki e scol ta mira un aceptacion pa hende cu ta identifica cu sexualidad y genero alternativo. Bon Dia a papia cu tanto docente como studiante riba e topico di e Purple Friday como tanto expresion alternativo di genero y sexualidad.

 Durante pauze na scol nos redaccion tabata presente y por a mira e detaye di un armband biña bisti pa varios studiante. Na momento cu a parti e armbandnan a duna un splicacion pa studiantenan riba kico e GSA Network ta y kico nan ta enfoca riba dje. Nos a tuma nota di varios studiante cu tabata entusiasma pa comparti e mensahe di diversidad y aceptacion cu e organisacion aki ta boga pe.

Ora a acerca studiantenan cu e armbandnan biña bisti hopi a expresa nan solidaridad cu e causa di laga personanan cu sexualidad alternativo y expresion di genero alternativo sinti nan mes mas sigur. E personanan aki entre otro ta consisti di persona cu ta identifica cu un letter den e abreviacion LGBT: Lesbian, Gay, Bisexual of Transgender. Pero e ta bay mas leu tambe, personanan cu no ta sigur cua identidad nan ta tuma over y personanan cu no necesariamente ta transgender pero tampoco ta bay di acuerdo di mester kies entre ta homber of muhe.

Studiante Alexandra, kende tabata na caminda pa busca algo di come na Niaska Snack a conta nos cu e ta haya e tipo di eventonan aki importante pa ‘hende no tin miedo di ta nan mes’. E studiante a sigui splica cu e ta haya ‘absurdo cu hende mester sconde ken nan ta pa miedo di loke otro hende lo pensa di nan’. “Hende mester tin libertad di stima ken cu nan kier sin sinti berguensa ni tin miedo pa termento.”

E prome GSA Network den Caribe
Hans van de Moosdijk, docente di matematica na Colegio Arubano y un di e personanan envolvi cu e organisacion GSA Network di e scol a conta nos mas den detaye kico e organisacion ta boga pe. E organisacion aki ta e prome cu ta existi riba tereno di diversidad di sexualidad y genero den Caribe.

‘Nos kier cuminsa un combersacion riba e topico di sexualidad alternativo y expresion di genero alternativo’, e docente a splica. Specificamente e organisacion kier crea un luga unda studiantenan por tin un ‘safe space’ pa expresa nan mes y tambe papia riba e topico di homosexualidad, bisexualidad, etc.

Un ehempel cu sr. van de Moosdijk ta duna ta cu nan ta yuda y guia studiantenan cu a realisa cu nan ta identifica cu un sexualidad alternativo pasa den henter e proceso di ‘coming out’ for di ‘cashi’. Esaki segun e docente semper ta un momento crucial y dificil pa tur persona cu ta identifica cu sexualidad y genero alternativo. “Semper tin un miedo si bo ta wordo acepta pa bo famia y amigonan.” Mas aleu pa hobennan tin posibilidad cu mayornan no lo acepta nan yiu su sexualidad. Esaki te hasta na Merca ta conduci e mayornan pa saca e mucha for di cas. E diferencia ta cu na Merca tin organisacionnan cu ta purba trece e hobennan aki na un luga unda por ofrece nan guia pa stabilisa nan situacion na cas.

E GSA na Colegio Arubano ta reuni mas o menos mensualmente y ta organisa charlanan cu expertonan of ‘role models’ den comunidad. Por ehempel segun sr. van de Moosdijk pronto psikiatra di hoben na Hospital lo reuni cu e studiantenan miembro di e GSA pa haya mas conscientisacion riba e parti emocional y psikico di ta un persona cu ta homosexual por ehempel.

Aunke e organisacion ta enfoca riba duna gui y conscientisacion pa hobennan LGBT sr. van de Moosdijk ta subraya cu e ta importante tambe pa nan tin personanan heterosexual cu por apoya e grupo aki. E ta expresa su gratitud na e maneho di e scol pa nan por a tene e evento aki cu ‘nos ta sinti a bay masha bon mes’. Esaki despues cu tabata cana cu stapnan chikito cu e maneho di scol pa por tene e evento. Aunke e ta tuma hopi esfuerso y pasenshi pasobra e maneho di scol no kier laga cosnan ‘bay mucho lihe’, e docente a expresa cu toch pa Aruba y sigur Caribe e maneho di scol ta pensando di manera basta progresivo y ta aplaudi esaki. Ponencianan di sr. van de Moosdijk ta haci desde un punto personal, pues no ta papia como representante di scol den cualkier manera.

‘E ta sinti bon pa sa cu hende ta acepta bo pa ken bo ta’
Un grupo di amigo studiante: Jayrill Garcia, Marwin Laaf y Honeymae Olivar a expresa cu despues di e Purple Friday por mira cu hende ta mas sigur pa expresa nan identidad. E importancia di esaki segun sra. Garcia ta pa e personan cu identidad alternativo sinti nan mes mas habri pa por expresa nan mes.

Segun tur tres studiante nan ta mira cu e pensamento ora ta trata di personanan LGBT na Aruba ta ‘cambiando rapidamente’. ‘Nos generacion ta mas habri pa e tipo di personanan aki. Mi ta kere ta pasobra hende di nos generacion a stop di interpreta bijbel demasiado literalmente’, segun sr. Laaf y sra. Olivar.

Segun sra. Garcia tin par di aspecto di bijbel cu no ta klop si pone esaki den contexto di bida diario den mundo moderno. “Por ehempel antes nan lo a tira bo cu piedra pa haci cierto cosnan y hende muhe no tabatin derecho. Ademas nos cultura ta keda cambia y nos no por keda pega den pasado.”

E GSA ta spera di tene e evento aki otro aña den december atrobe.

You May Also Like

Bon comunicacion entre cliente y Servicio di Impuesto ta importante

Relaciona cu algun personanan cu a expresa malcontento riba social media e ultimo dianan ...

Te ainda trafico maritimo entre Aruba y Venezuela no a keda reestableci

Un siman despues cu prome minister, Evelyn Wever-Croes (MEP) a anuncia cu Venezuela a ...

Corte a rechasa peticion pa revoca bancarota di Tiara

Corte a rechasa e peticion pa revoca e estado di bancarota di Tiara Air, ...

13dialyse (NW) (3).jpg

35 aña di Clinica di Dialyse

Ayera Clinica di Dialyse (Dialyze Kliniek) na Dr. Horacio Oduber Hospital a celebra su ...

Come insecto den cuadro di e 6 Green Education Symposium

Ayera mainta e studiantenan di John Wesley College di San Nicolas y Mon Plaisir ...

13-11-16accheridonoord (1).JPG

Dos auto basta kibra den accidente na Noord

Diadomingo den careda di 6 or mainta riba e caminda di Noord altura di ...