ORANJESTAD – Caribbean Cinemas VIP na Paseo Herencia pronto lo ta habriendo su porta pa publico cu 6 auditorium full nobo: 2 auditorium ta cu stoelnan VIP recliner cu nan top di mesa individual y e otro 4 auditorium nan tin un combinacion di e stoelnan tradicional high back rockers cu e VIP. E stoelnan di cuero reclinable ta opera cu un touch button cual ta haci su maneho hopi facil. Pa e localidad nobo aki mester a emplea 50 empleado pa e area di construccion y 40 empleado pa e cinema mes.
E concepto di VIP por wordo defini door di e diferente servicio y experiencia cu e persona lo experencia na momento di wak un pelicula. Come y bebe den un auditórium completamente safe, relax y confortabel. E theater na Paseo Herencia lo consisti di un lounge area cu un menu mas extenso y lo tin servicio te na bo stoel.
Caribbean Cinemas VIP na Paseo Herencia ta introduciendo lo ultimo den e tecnologia di projecter cual ta e la e laser projecter, esaki lo duna un imagen mas detaya y limpi, color nan mas bright y defini y lo spaar 30% riba e consumo di coriente, esaki en comparacion cu e Xenon projecters.
Caribbean Cinemas na e momento aki ta celebrando 50 aniversario desde cu e la wordo funda na Puerto Rico y tin mas di 60 localidad den Caribe, America Central y Sur America. Na 2011 e compania a habri su prome theater na Aruba, Caribbean Cinemas Megaplex 8 na Palm Beach Plaza, cu 8 auditorium incluyendo: 2 VIP y 1 CXC (Caribbean Cinemas Extreme), nan Premium Large Format Auditorium cu Dolby Atmos surround system. Tambe como parti di nan programacion alternativo nan ta presenta e Bolshoi Ballet y e Opera Metropolitana.
“Nos ta wak esaki como un oportunidad pa ofrece nos clientenan un bon combinacion di 14 pantaya den 2 localidad hopi cerca di otro, esta Paseo Herencia y Palm Beach Plaza. Nos clientenan lo haya e miho servicio mirando cu nos por haci e programacion mas versátil, cu orarionan prolonga y pelicula mas popular cu diferente orario.
