E Citgo Desk ta e oficina cu Gobierno di Aruba lo establece dentro di poco na San Nicolas pa asina cuminsa atende personanan cu tin interes pa traha cu un contratista den e refineria of sea cu e refineria directamente. Recientemente Minister di Labor drs. Paul Croes a anuncia cu hunto cu su colega Minister Ing. Mike de Meza lo ta instalando un comision cu lo consisti di trahadornan di Departamento di Labor y tambe miembronan di Comision di Energia cu Minister de Meza pa asina ricibi curriculum y interes di personanan cu lo por traha den e refineria.
“Trabaonan preparatorio ya a inicia. Por medio di e email central CGinfodesk@arubagovernment.aw interesadonan pa un trabao den refineria por manda nan curriculum vitae. Naturalmente esaki no ta un garantia cu lo bo haya un empleo como cu mester ta un funcion cu bo por eherce y bo mester por conta cu e experiencia naturalmente. Pero sigur nos lo purba nos maximo pa haci e contacto cu companianan relevante. Banda di esaki e Citgo Desk lo duna nos Arubianonan cu cierto grado di experiencia un posicion mas fuerte contra cualkier trahador cu bini di afo pa trabao den refineria”, minister Paul Croes a indica.
Tin hopi Arubianonan den exterior cu ya caba a manda nan interes pa e mail indica, interes for di diferente paisnan rond di mundo. Tambe e Citgo Desk ya caba a registra mas di 150 persona interesa. Na momento cu e acuerdo final keda formalisa, trabaonan real lo inicia. Dentro di poco gobierno lo anuncia e localidad unda e Citgo Desk fisicamente lo ta situa na San Nicolas.
