Prome minister Gilmar ‘Pik’ Pisas y Minister Hulandes pa Clima y Energia, Rob Jetten a discuti cambio climatico den un combersacion cu oficialnan di gobierno di Aruba y Sint Maarten. E tema tabata e Conferencia di Cambio Climatico di Nacionnan Uni (COP 27) riba Cambio Climatico.
Esaki a keda reporta pa portal online di Corsou, CuraçaoChronicle.
Ademas di Rob Jetten, prome minister Silveria Jacobs di Sint Maarten, vice-prome minister y minister di Integridad, Transporte, Naturalesa y Asuntonan di Adulto Mayor di Aruba, Ursell Arends a participa den e combersacion. Secretario di Estado pa Relacionnan di Reino, Alexandra van Huffelen tambe tabata presente durante e reunion.
Jetten a pidi un disculpa pa no involucra e paisnan Caribense den e conferencia di clima anteriormente, bisando cu e ta bay haci esaki proximo biaha. E kier consulta lo mas posible cu e paisnan tocante clima. Pisas a indica cu Corsou tin mucho tiki hende pa implementa e tratadonan, agregando cu e ta kere cu un pais chikito den Caribe manera Corsou lo mester tin mas fondo. Di e forma aki por realisa mas proyecto pa combati e consecuencianan di cambio climatico.
Durante e reunion a acorda cu ta bay tin mas cooperacion entre Corsou y Hulanda riba proyectonan concreto cu clima como topico. Ademas, Jetten ta bay drenta den combersacion cu minister Hulandes di Relacionnan Exterior, Wopke Hoekstra pa ricibi mas sosten pa aplicacion di tratadonan internacional relaciona cu cambio climatico, manera e Convencion di Nacionnan Uni riba Cambio Climatico.
Durante e consulta tambe a acorda cu ta bay organisa un conferencia di clima na Aruba, cual ta bay tuma lugar proximo aña.
