otmar oduber.jpg

otmar oduber.jpgAyera a tuma luga e reunion publico cu minister di Infrastructura, Otmar Oduber (POR) a pidi pa atende den parlamento loke el a cualifica como ‘crisis hopi grandi den e proyecto Green Corridor’. Aunke e mega proyecto aki pa balor di 295 miyon florin ta mustra fisicamente cla, ainda tin asunto pendiente cu tin di haber cu su financiamento y e compromiso cu e instancianan of banconan cu a facilita e debe aki.

E mandatario a bisa cu e situacion aki ta bastante serio, ya cu no solamente e proyecto aki ta den crisis sino cu a drenta den un etapa di ‘recovery mode’. Esaki ta nifica un etapa pa cuminsa recobra como pais pa evita e daño grandi riba e proyecto aki, sea den calidad y servicio, pero tambe financiero pa nos pais. E banconan cu a fia e placa no por duna pais Aruba niun fecha final, ya cu e acuerdo aki ta cu e compania Odinsa (CC). Pues e compania Odinsa tin te diahuebs awor 18 di januari pa bisa nan fiadonan, si ta bay tin un proceso di recovery si of no.

Den caso cu nan bay den un periodo di recovery, nan ta duna casi un luna di tempo pa por yega na un acuerdo cu pais Aruba. Sino e fiadonan lo bay exigi di Odinsa pa paga nan tur nan placa. Esaki no ta unicamente loke nan a fia Odinsa, pero tambe esaki por inclui tur e ganashi cu nan no por haya den e proximo 17 aña, segun e mandatario.

E mandatario a laga sa cu su ministerio no a sinta ainda cu Odinsa. Den e caso aki, e ta considera como gobierno cu departamento DOW ta esun cu ta bay representa nan. Tampoco e no ta haya corecto cu gobierno ta bay drenta den discusion. E ta haya cu den e situacion aki tin dos partido envolvi cu ta DOW representando gobierno y Odinsa, ya cu eynan e experticio ta riba kico a sosode y kico no a sosode.

El a bisa cu e situacion aki no tabata uno sorpresa, ya cu for di januari aña pasa a cuminsa alerta cu e proyecto aki no tabata canando bon. Tambe na augustus y september e fase di crisis aki a wordo anuncia, unda a anuncia u nan no lo wordo cumpli cu loke ta para den e contract.

Aunke e compania Odinsa cu ta esun cu a ehecuta e proyecto aki ta primordialmente responsabel pa esaki, pero e consecuencia debi na e forma cu e contract aki ta hinca den otro lo afecta Aruba tambe. Considerando cu nos ta papiando di un proyecto di infrastructura, nan no por bay pa ehempel cu e brug of asfalt, pero si pais Aruba tin cu paga pa un producto inferior sin garantia pa e proximo 17 aña. Minister Oduber a pidi e reunion pa evita cu e situacion por sigui scala y asina drenta den un etapa di negociacion pa por lo menos por haya e balor un tiki mas cerca di e producto y servicio cu a pidi inicialmente pe. Pero el a indica cu te hasta den e proceso di negociacion aki, pais Aruba ta bay perde. Pero te ainda nan no tin niun calculacion of cifra con hopi nos ta bay perde.

 

Falta di control
Otro punto cu a wordo señala durante e debate den parlamento tabata e falta di control debido di e proyecto aki. Ya cu un aña y mey a dura prome cu e minister anterior di Infrastructura, Benny Servinger (AVP) a duna aprobacion na PwC cu mester a haci e control riba peticion di DOW. Esaki pa motibo cu e departamento a pidi ayudo como nan no tin e experticio den cas pa haci e control.

Minister Oduber ta haya cu gran mayoria di e deficiencia di e proyecto aki tabata debi cu dificilmente nan no por bay bek pa controla. Un documento cu el a facilita prensa ta data di 20 di september caminda DOW ta alerta un biaha mas riba e situacion di crisis di e proyecto aki y un up date di e consecuencianan pa minimalisa nan.


E ta lamenta cu ex minister Sevinger a bisa durante e reunion publico aki cu e ‘don’t give a damn’, y cu e no tabatin corespondencia, mientras cu casi 300 miyon dollar a wordo inverti den e proyecto aki. Segun minister Oduber su antecesor no tabatin niun atencion pa e problema y crisis cu e proyecto aki tabata pasando aden.

Odinsa no ta di confia’
Un di e critica cu tabatin durante e debate aki di parti di parlamento ta cu no tabatin niun control na comienso. Sino te ora cu PwC a drenta na 2016 caminda nan a mustra riba e echo cu Odinsa no ta ni di confia, tampoco cu nan no tabatin e conocemento pa eherce e proyecto aki y tampoco nan no ta preparando pa entrega e proyecto aki debidamente.

Segun minister Oduber, su antecesor no a haci nada cu e informacion aki, sino al contrario a ignora e situacion aki. Mientras for di 2015 DOW tabata bisa e minister di Infrastructura anterior cu tabatin mester ayudo di hendenan cu tin e conocemento pa controla e realisacion di e proyecto aki.

Tin alrededor di 500 punto di duda riba e realisacion di e proyecto aki te hasta riba e brug. Segun minister Oduber, pa ehempel no tabatin control con nan a traha e fundeshi di e brug. Tampoco cu e brug aki no a wordo gekeur. Pero aworaki ta dificil pa bisa e compania cu nan no a cumpli cu cierto puntonan, ya cu gewoon no tabatin e control debido.

E 500 punto aki cu un instituto di ingeniero independiente trece dilanti ta solamente riba locual nan por constata den e momento aki cu e proyecto ta casi cla. E minister no ta descarta cu lo tin mas.

E mandatario ta indigna despues cu el a yega di reuni na december cu e grupo, nan no a duna informacion completo na dje. Te awor cu na cuminsamento di aña el a cuminsa pidi mas documento, e por realisa e situacion actual di e proyecto aki. Pero tampoco parlamento no tabata na haltura di e situacion actual y esaki ta un asunto cu nan ta bay investiga pa haya sa dicon e informacion aki no a yega debidamente. Of e informacion a yega cerca nan no tabatin e contenido real di e situacion di e proyecto Green Corridor, asina sr. Oduber a remarca ayera den parlamento.