Proyecto Shoco Wellness tin seis aña den ehecucion: “Sosten pa salud mental ta crucial”

Ansiedad, miedo, falta di confianza, pero tambe trauma personal por stroba un studiante di completa su estudio. Esaki tambe ta motibo pakico lider di e proyecto Shoco Wellness, esta dr. Juliet Chiew ta contento di mira con hopi ta haci uso di e servicionan pa ayudo mental.

Shoco Wellness ta un proyecto di salud mental y bienestar financia pa e fondo di estimulo di OCW, cu ta e Ministerio di Enseñansa, Cultura y Ciencia di Hulanda, dirigi pa studiantenan y miembronan di staff na Universidad di Aruba (UA), Instituto Pedagogico Arubano (IPA), y Enseñansa Profesional Intermedio (EPI). Oficina di Shoco Wellness ta ubica na edificio di UA, cu un total di 13 psicologo local y internacional cu ta brinda un servicio unico na bienestar di e gruponan menciona. Ta trata aki di terapistanan profesional cu ta ofrece nan apoyo na un prijs hopi reduci pa asina sigura exito di un programa, cu segun datonan anecdotal, ta traha. “Pero, awor mester percura pa datonan concreto,” e lider di proyecto, dr. Chiew a bisa Bon Dia Aruba. Pa tal motibo mes, e ta spera di por ehecuta un investigacion riba e corelacion entre e servicionan di Shoco Wellness y exito den estudio, of ehecucion di trabao.

Pero aunke cu esakinan ta datonan importante pa asina sigura cu por prueba cu un proyecto di sosten pa salud mental y bienestar ta esencial, ya caba e ta convenci cu Shoco Wellness ta haci diferencia den bida di studiantenan y staff di e tres institucion. “Na comienzo, na 2019, Shoco Wellness tabata algo nobo. Tabata e propio conseheronan di studiante cu tabata avisa studiantenan di e proyecto. Pero den dos aña nos tin como 70 studiante ta aplica, pa aña.” A ripara cu na comienzo, nos tabata haya hopi peticion for di studiantenan cu ta cuminza nan trayectoria di estudio. Awor, hopi di nan, drentando sea nan periodo di stage, of skirbimento di nan tesis, ta bolbe acerca pa ayudo, Chiew a conta.

Dr. Chiew ta splica cu e modelo cu e proyecto ta usa ta inclui bienestar na un banda y angustia na e otro. Ta usa e color berde pa indica ora un persona ta floreciendo, cu ta indica un nivel halto di bienestar mental y social. E otro banda ta e zona geel, cu ta indica nivelnan abao di bienestar y angustia limita y temporal. Pero tambe ta tene cuenta cu e zona oranje cu ta indica un lucha continuo y zona cora cu ta indicacion di un persona cu ta tambaleando cu mester di ayudo urgente.

Y e ayudo ta inclui cinco sesion individual cu un terapista profesional. Den comienzo, e sesionnan individual tabata tres, pero e terapistanan a indica cu esaki no tabata suficiente y asina a amplia e cantidad na cinco. Motibo ta cu hopi biaha, particularmente si ta papia di trauma for di mucha y abuso, ta manera cu ta habri un ‘pandora box,’ y mester brinda mas guia. Aki ta unda e terapista tin e opcion pa pidi pa e opcion pa otro cinco sesion. Y si e terapista ta considera cu mester mas, e tin e opcion pa amplia e sesion individual cu otro cinco biaha. “E psicologonan ta hopi comprometi y ta bisa di ta gusta pa traha pa e populacion di studiantenan pasobra ta hendenan cu ta haci nan ‘huiswerk.’”

Den caso cu ta necesario ta expande e sesion cu famianan, dependiendo e contexto, pa asina brinda un sosten amplio. “Mi ta hopi agradecido na tur e terapistanan, e psicologo den e red aki. Nan ta fabuloso. Nos mester mas psicologo riba e isla, idealmente na tur scol.” Es mas, Chiew cu tabata encarga cu Cuido di Calidad na Universidad di Aruba tabata tende di e propio docentenan pa hopi tempo cu nan ta kere cu mester di psicologo pa e studiantenan, cu tabata expresa nan preocupacionnan cu persona cu no ta psicologo y no tin e capacidad pa yuda den casonan cu no ta di trata di e estudio mes. E momento cu studiantenan a cuminza expresa nan pensamentonan riba papel di examen tabata indicacion cu mester tuma accion. Chiew for di su funcion di Cuido di Calidad a prepara un encuesta na 2018 pa por determina e ‘status’ di e studiantenan. Asina a bin e proyecto Shoco Wellness cu a haya e financiamento di OCW.

Analisis

Na e momentonan aki, docentenan di UA, IPA y EPI ta indica e impacto di Shoco Wellness riba resultadonan academico, pero Chiew a bisa cu esey no ta suficiente. Como tal, e organisacion mes ta preparando un encuesta pa por midi e impacto. “E unico mi por bisa ta cu aplicacionnan a subi y cu tin studiante cu ta ripiti.”

Salud Mental

Segun Juliet Chiew, e paso pa busca ayudo psicologico no ta un paso cu na Aruba ta tuma sin mas. E ta un proceso cu a tuma tempo, pa hende realisa cu salud mental ta importante. Antes tabata bay dokter cu tabata esun cu tabata prescribi pa bay psicologico. Pero awor cu mas conscientisacion, hende ta realisa cu keda sin drumi, ta tristo, tin dolor den curazon cu no por describi, ta rekeri ayudo psicologico. “Nos ta yegando na un punto, cu tin un reconocimento mas amplio cu salud mental ta hopi importante.”

Bon Dia Aruba lo amplia riba e mision di Shoco Wellness y su impacto den un siguiente edicion.