(NLTimes) – Lider di PVV Geert Wilders a ocasiona mas cu 2.500 keho di discriminacion den djis algun dia pa motibo di un publicacion controversial riba medionan social, AD ta informa.

E publicacion, comparti na comienso di e siman aki, ta mustra un imagen dividi: na man robes, un muhe cabey blond cu ta marca manera “PVV,” y na man drechi, un muhe di edad bisti cu un paña di cabes, marca manera “PvdA.” Wilders a skirbi: “E escogencia ta di bo dia 10/29,” referiendo na e proximo eleccionnan di 29 di oktober.

Discriminatie.nl, e centro nacional di reportahe contra discriminacion, a confirma e inundacion sin precedente di kehonan, señalando cu solamente un incidente anterior a lanta mas: e cancion satirico di 2020 ‘Prevention Is Better than Chinese’ lansa durante e pandemia di COVID-19, cu a genera alrededor di cuater mil informe.

“E cantidad di informenan aki ta un señal cla di sociedad,” un vocero a bisa, yamando e publicacion “polarisante, stigmatisante y discriminatorio.” Hopi denunciante ta bisa cu e publicacion ta dirigi deliberadamente na mustra e Musulmannan den un lus negativo. “E palabranan cu nos ta mira den e rapportnan ta inclui ‘sin smaak,’ ‘odioso,’ y ‘racista,’” e vocero a agrega. Varios denunciante a compara e imagennan di Wilders cu propaganda nazi cu tabata dirigi riba hudiunan durante Segundo Guera Mundial.

Discriminatie.nl ta ricibi informe ainda y ta considerando e siguiente pasonan. “Nos no a dicidi ainda, pero entrega un keho formal ta un di e opcionnan,” e vocero a bisa.

E controversia actual ta recorda e condena di Wilders na Corte Supremo na 2021 pa instiga odio y violencia contra Marocanonan, poniendo fin na un proceso legal di siete aña.

Na maart 2014, Wilders a puntra un publico na un café na Den Haag si nan tabata kier “mas of menos Marocano den e ciudad aki y Hulanda.” E multitud a grita “menos, menos, menos,” na cual Wilders a contesta, “Wel anto nos lo regla esey.”

“Insulto den grupo ta prohibi bou di e Codigo Penal,” e presidente di Corte Supremo a bisa den su decision. “Hasta un politico mester atene su mes na e principionan basico di estado di derecho y no mester instiga intolerancia.” E corte a yama e declaracionnan di Wilders “innecesariamente dañino,” hasta si nan a ser haci den un contexto di debate politico.

Wilders a ser haya culpabel na 2016 di insulta un grupo y instiga discriminacion pero no a ser castiga, cu e corte a declara cu e veredicto mes tabata castigo suficiente. Tanto Wilders como Fiscal di Ministerio Publico a apela, pero corte di apelacion a mantene e veredicto sin castigo.

Wilders a rechasa e caso como un persecucion politico di e Ministerio di Husticia y Seguridad, un acusacion cu cortenan a rechasa ripitidamente pa falta di evidencia.

E sentencia di Corte Supremo ta definitivo na Hulanda, sin mas apelacion domestico posibel. E unico opcion pa hiba e caso mas leu ta na Corte Europeo di Derechonan Humano si un violacion di derechonan ta ser reclama.