Den e ultimo dianan a surgi varios comentario riba Facebook tocante e proceso di construccion cu ta andando actualmente den area di busstacion na San Nicolas, unda luna pasa a cuminsa cu e prome fase di e proyecto di revitalisacion di San Nicolas. Pueblo ta keda expresa nan frustracion tocante e cambio cu nan ta considera innecesario y e peligro cu esaki por trece pa bishitantenan den e area.

Dia 9 di juni, gobierno di Aruba a anuncia e comienso oficial di e proyecto di revitalisacion den area di San Nicolas, unda minister Arthur Dowers—e tempo ey ainda encarga cu cartera di Infrastructura—y minister di Finanzas Geoffrey Wever a presencia e apertura oficial di e proyecto riba B. vd.Veen Zeppenfeldstraat. Den un comunicado di gobierno publica e mesun dia, a enfatisa cu e proyecto aki ta forma parti di gobierno su vision pa “pa mehora e calidad di bida di e habitantenan di San Nicolas”. A divulga cu e proyecto aki lo mira varios trabao di revitalisacion, incluyendo renobacion di caminda, cayanan y espacionan comun; promocion di desaroyo economico local; impulso di turismo y comercio y inclusion di tur ciudadano den e rikesa di nos Pais.

Sinembargo, e proyecto aki ya ta enfrentando un ola di critica y preocupacion for di ciudadanonan.

Aunke den e ultimo añanan tabatin apelacion amplio pa duna San Nicolas su merecido atencion, varios ciudadano a expresa recien cu varios aspecto di e proyecto no ta duna gran contribucion na e ciudad manera ta anticipa. A menciona por ehempel cu e renobacion di e caminda den e area menciona ta innecesario. Algun ta enfatisa cu en bes di renoba e pida caminda entre busstacion di SETAR N.V., mester a haci renobacion di caminda mas pariba den mainstreet di San Nicolas. Otronan ta preocupa cu esaki por tin consecuencianan negativo pa Carnaval, di cual ta conoci cu SMAC ta usa e ruta ey pa organisa varios parada, specialmente e Parada Grandi di San Nicolas. Manera un usuario a bisa: “Construccion ta fatal pa carnaval, sea ta modifikele of mester busca ruta alternativo pa carnaval. Si lage manera e ta wordu construi actualmente ningun trailer lo por tuma e birada ey.”

Sr. Hilario Doncker, un voz conoci den sociedad cu sa boga pa San Nicolas, a acerca SMAC pa cu e situacion aki, unda segun e, presidente Darren van Ommeren a splica cu SMAC no tabatin ningun participacion den e plan di revitalisacion. A sigui splica cu si e proyecto aki lo causa un necesidad pa cambia ruta di Carnaval den futuro—cual por resulta cu carosanan no por pasa den e parti di e caya ey—SMAC lo no por carga e responsabilidad aki.

Di su banda, minister Wever a publica un comunicado den cual el a sigura cu e proyecto di revitalisacion “lo tin solamente resultado positivo pa San Nicolas.” Den su comunicado, minister Wever ta reconoce e preocupacionnan di ciudadanonan pa loke ta trata e tamaño di e caminda. Pa esaki, el a splica cu desde comienso a tuma consideracion di varios aspecto importante, incluyendo e ruta di Carnaval. Pa esaki, minister a sigura cu e caminda no lo causa ningun disturbio pa carosa ni participantenan den carnaval.

Tambe el a atende e preocupacion cu e caminda di B. vd.Veen Zeppenfeldstraat pa Caya Captain Rogers lo ta un ‘een-richtingsverkeer’, clarificando cu esaki no ta e caso y cu lo mantene e caminda como uno di dos direccion. Asina mes, ta aparente cu algun ciudadano ainda ta reserva nan duda riba e birada aki.

Den un publicacion recien riba red social, un usuario a mustra con e trafico ta sinti awor cu e ta smal. Den su publicacion, e usuario a expresa cu pa pasa riba e caminda den auto di famia ta posible ainda sin peligro cu esaki lo dal contra un otro banda di dje. A nota cu e caminda en berdad ta sinti mas smal, y e usuario a cuestiona si trucknan lo tin dificultad pa pasa riba e caminda. Un otro usuario tambe a bay investiga riba su mes con trafico ta cana awor. Den su video publica riba Facebook, por a mira un truck di bombero coriendo riba e caminda bayendo ariba, cu dos auto biniendo di direccion contrario. Por a mira cu e dos autonan a desvia for di e caminda renoba, pasa den e busstacion, y a sali na e otro banda pa asina evadi pasa banda di e truck. Mester nota cu e truck di bombero no tabatin luz ni sirena cendi, pues pa desvia no tabata necesario, sino ta parce cu esaki ta resalta e duda cu ciudadanonan tin ainda pa pasa riba e caminda smal aki.

Un otro punto tabata siguridad riba e birada bayendo Caya Captain Rogers. E mesun usuario aki a publica un otro video den cual por mira varios bus saliendo for di e stacion y lora drenta Caya Captain Rogers. Ta conoci cu busnan, ora ta tuma biradanan skerpi, mester tuma mas espacio for di e otro banda pa por haci un birada sigur. Den e video por a nota cu awor biradanan bay ariba ta tuma henter e espacio di trafico contrario, cual por crea un situacion peligroso. Tambe por mira con cerca e bus tin cu pasa banda di e ‘side walk’ nobo den e birada. E doño di e video aki ta expresa su frustracion, subrayando cu e side walk ta crea mas riesgo cu beneficio pa peaton y chauffeur pasando den e area.

Tur esaki ta resalta e falta di confiansa atrobe di pueblo pa gobernantenan cu ta campaña pa mehora San Nicolas. Gobierno a comparti cu e vision pa e proyecto aki ta pa traha un vierbaansweg, restaura monumentonan y e reanimacion di turismo cultural, pero mirando cu ya e prome fase aki a trece su criticonan, ta parce cu e plan aki ta exhibi cierto duda.

Potretnan di usuario Alison Williams riba Facebook.