Durante e ultimo par dia frustracion a surgi entre pueblo pa motibo di un decision tuma pa gobierno pa impone dia liber pa sector publico dialuna binidero, esta 26 di januari. E decision repentino aki a laga hende disgusta, cu hopi bisando cu e decision aki tabata mucho riba man y no tabata husto pa e sector priva. ATIA tambe a lamenta e maneho aki, haciendo yamado pa tuma mas consideracion pa comercio y pueblo den futuro.

E decreto ta bisa cu a tuma e decision aki dia 19 di januari—apenas un siman prome cu e celebracion anual di nos libertador—a base di Articulonan 21 y 22 et seq di Ordenansa Laboral 2013. Manera a splica, e decision aki a bin pa motibo cu Dia di Betico e aña aki lo cay riba un diadomingo, esencialmente kitando un dia liber di trahadornan. Consecuentemente, dialuna 26 di januari a ser designa como e dia festivo oficial segun Articulo 22 di Ordenansa Laboral en bes di diadomingo dia 25.

Inicialmente, e decreto aki a ser ricibi positivamente, unda hopi a expresa nan gratitud pa por haya un poco mas descanso. Sinembargo no a tarda mucho pa comunidad keda confundi tocante ken lo beneficia di e dia liber aki.

Varios ora despues di e prome publicacion, minister Wendrick Cicilia a manda un comunicado anulando e decision: “Mester aclaria cu e dia liber y di fiesta ta keda diadomingo. E dia siguiente ta un dia extra di descanso cu gobierno ta ofrece na su empleadonan. Pues si un empleado traha riba dialuna, e lo no cobra dobel, solamente si mester traha riba diadomingo dia 25 di januari 2026,” e minister a bisa den e comunicado.

E anulacion aki a causa un ola di ciudadano frustra, cu varios criticando e minister su maneho di e decision aki. Hopi ta expresa cu e decision aki tabata mucho riba man, y pa anul’e mesora no tabata mustra hopi profesional: “Esaki si ta amateurismo, sorry”, un usuario a nota. Otronan a tira criticanan mas fuerte, cuestionando e minister su habilidad como mandato, yamando e situacion aki un “blunder” di parti Cicilia. Otro sentimento tambe a surgi cu no tabata husto cu sector publico si lo disfruta di e dia liber diseña pa “un miho balans trabao-bida personal” y sector priva ta keda afo.

Den su splicacion, e minister a splica cu pa loke ta e sector priva, imponiendo un dia liber no ta den cuadra di ley, subrayando cu e decision aki lo trece consecuencianan significativo riba entrada di negoshinan: “E berdad ta cu den varios sector, e decision pa cambia e dia liber di diadomingo pa dialuna, den un lapso di tempo asina cortico, lo a causa retonan inespera. P’esey ta subraya cu e dia liber dialuna ta pa gobierno y pa sector priva un apelacion,” e comunicado ta agrega.

E minister a manda un apelacion na comercio pa, te unda por, habri espacio pa nan empleadonan tambe por tin un dia di descanso despues di a celebra e dia nacional riba diadomingo.

Di su parti, Aruba Trade & Industry Association a lamenta con gobierno a maneha e situacion aki, enfatisando cu “un medida asina mester duna comercio tempo pa por prepara, cambia schedule y citanan cu ya caba tin programa cu cliente.” E gremio ta pidi pa den futuro gobierno tin mas consideracion e consecuencianan financiero cu esaki ta trece pa comercio “y pueblo mes como cliente.”

A pesar di tin bon intencion pa pueblo, e situacion aki a laga minister Cicilia mustra dudoso den bista di algun ciudadano, y a pone mas presion riba dje como e mandato mas jong den historia politico di Aruba.