(ElNuevoDia) – Na momento di renoba nan licencia, tur dokter na Puerto Rico mester cumpli cu dos credito di bioetica pa loke ta trata sensibilidad ora di atende pashentnan di e comunidad LGBTQ+.

Asina e Junta de Licenciamiento y Disciplina Medica de Puerto Rico a certifica den su resolucion di dia 17 di augustus di e aña aki. Den e resolucion, nan ta establece cu ta bay tin cuater credito obligatorio pa e renobacion di e licencia di dokter na e pais: un di hipertension, un di diabetes y dos di etica tocante e no discriminacion pa e genero LGBTQ+.

Pa dokter Ivan Melendez Rivera, e determinacion aki, cu lo ta vigente for di 2023 te 2025, “ta representa un logro di un apertura di comprendemento, di rasonamento, di wak e necesidad cu ta existi.”

Ademas di esnan di educacion obligatorio, e dokternan mester cumpli otro serie di credito, di nan seleccion, pa renoba nan licencia. E ultimonan aki, Melendez Rivera a indica, casi semper ta enfeca den e area di specialidad.

Un aña pasa, e secretario di Salud, Carlos Mellado Lopez, a restitui e obligacion di e curso di sensibilidad y competencia pa e comunidad LGBTQ+, despues cu el a wordo elimina riba peticion di algun medico.

Basa riba experiencia di e fundador di e Centro Ararat, regularmente, e personanan di e grupo ta yega extremadamente laat na e servicionan di salud, tanto preventivo como pa e tratamento di diferente condicionnan. E rasonnan, Melendez Rivera a señala, ta pa miedo di wordo husga of cu nan ta referi na nan cu un genero cu cual nan no ta identifica.

Den e casonan cu si nan ta acudi na e consultorionan, por pasa cu e personanan no ta sinti comodo compartiendo tur e informacion necesario pa yega na un diagnostico of pa referi na pruebanan di siguimento.

“No conoce tin biaha e forma con e profesional di salud mester dirigi nan mes na e personanan di e grupo aki, obviamente, ta limita e preguntanan cu ta wordo haci pa por haci e testnan di observacion cu ta necesario pa por detecta algun condicion di salud of preveni,” el a agrega.

E cursonan por contribui pa “crea un politica di porta habri pa e personanan por yega trankil y ricibi un servicio digno manera cualkier otro persona ta ricibi cu no ta di e grupo LGBTQI, y manera mi ta ripiti, e ta etica, pasobra e ta prti di nos etica como dokter pa ofrece un trato digno na tur hende,” el a apunta.

E cursonan cu e dokternan por tuma pa cumpli cu e dos creditonan obligatorio ta ser ofreci pa diferente organisacion, entre esunnan cu ta destaca ta e AIDS Training and Education Center, e Asociacion de Medicos Tratantes de VIH de Puerto Rico y e departamento educativo di e Centro Ararat, cu ta hospeda Translucent, un clinica di salud primario pa personanan trans.

“Ami no por wak e como un victoria of un no victoria, pasobra aki no tin ningun guera pa logra un victoria. Aki, e ta simplemente siña, ta habri na obtene conocementonan constante nobo. Esey ta medicina,” Melendez Rivera a conclui.