(NLTimes) – Tanto e Partido pa Libertad (PVV) como JA21 a publica nan programanan di eleccion prome cu e proximo eleccionnan di Tweede Kamer, cada un enfoca riba controlnan di migracion mas estricto y seguridad domestico mas fuerte, mientras cu ta diferencia riba prioridadnan socio-economico y di gobernacion.

PVV, lidera unicamente pa Geert Wilders, ta hibando campaña riba un ceramento completo di Hulanda pa solicitantenan di asilo. Den e prologo di e programa, titula “Dit is uw land! (“Esaki ta bo pais!”), Wilders ta skirbi cu e pais ta “yen. Demasiado. Ta rementa.”

E partido ta pidi pa un paro total temporal di cuater aña di asilo y ta argumenta cu e gastonan anual di asilo ta yega nuebe biyon euro, vinculando migracion na criminalidad creciente den pueblonan manera Ter Apel y Budel.

E programa di PVV ta boga pa ciere di tur centro di asilo, e regreso di Sirionan na nan pais of otro nacionnan Arabe, caba cu obligacionnan bou di e Convencion di Refugiado di Nacionnan Uni, para reunificacion familiar, y deporta tur homber Ucraniano.

E plan ta rebiba parti di un strategia di dies punto cu Wilders a presenta anteriormente. El a ser rechasa den negociacionnan di coalicion, contribuyendo na e caida di e gabinete Schoof.

Economicamente, PVV ta priminti impuestonan mas abou, eliminacion di e deducibel di cuido di salud, y un IVA (impuesto) di 0% riba comestibel, mientras ta aumenta IVA riba actividadnan cultural na 21%.

E partido ta anticipa spaarmento door di caba cu ayudo di desaroyo, ciere di centronan di asilo, y reduccion di contribucionnan di Union Europeo, aunke e programa no ta provee ​​calculacionnan di gasto pa ciere di frontera of despliegue militar.

Tambe PVV ta pone enfasis riba seguridad interno, incluyendo un cuerpo policial amplia y cambionan den areglonan di prison. Como cu e partido tin solamente un miembro—Wilders—e programa no ta rekeri aprobacion interno.

JA21, dirigi pa Joost Eerdmans, ta enfatisa riba tin menos regla, mas espacio pa empresario, y mas influencia di ciudadano a traves di referendumnan obligatorio.

E partido ta propone un gobierno mas chikito pero kier dos puesto nobo den gabinete: un secretario pa energia nuclear pa acelera construccion di plantanan nuclear, y un minister pa eficiencia y autonomia di gobierno pa supervisa referendumnan cu ta permiti ciudadanonan anula legislacion parlamentario.

JA21 tambe ta enfoca riba politicanan di migracion mas estricto pa alivia e presionnan di mercado di vivienda, proponiendo revocacion di e ley di dispersion, limitenan riba reunificacion familiar, y ehecucion di frontera mas fuerte. E partido lo usa fondonan di ayudo pa desaroyo pa cubri gastonan legal pa solicitantenan di asilo criminal. El a bisa cu e ta priorisa proteccion di “balornan occidental” y kier un supervision mas estricto di scolnan Islamico.

JA21 ta posiciona su mes como un partido di ley y orden, primintiendo aumento di financiamento di seguridad domestico, castigo mas severo pa criminalnan, y e regreso di polis di ferry.

Pa loke ta trata defensa, e ta sostene e norma di gasto di GDP di 2% di NATO y tin como meta pa crece e forsa laboral di defensa militar y civil na 200 mil persona pa 2035.

E plan di impuesto di e partido ta inclui un tarifa corporativo unico, abolicion di belasting di propiedadnan significante di compania, y eliminacion di impuesto riba herencia y regalo.

JA21 tambe ta resalta medidanan contra violencia domestico y feminicidio, proponiendo “casnan di friamento” (cooling houses) pa e perpetradornan pa permiti victimanan keda na cas. Otro politicanan ta trata migracion, educacion, libertadnan civil y posicionamento internacional, incluyendo restriccionnan riba migracion di hende cu tiki habilidad, reversion di recorte di deducibel di cuido di salud, prohibicion di tapa cara na manifestacionnan, y realocacion di e embahada Hulandes pa Jerusalem.