Minister di Finanzas, Asunto Economico y Sector Primario, mr. Geoffrey Wever den colaboracion cu Qredits Aruba a organisa un bes mas e Qreative Business Academy. Den transcurso di 10 siman e participantenan lo ricibi diferente lectura relaciona cu e industria creativo y herment necesario pa maneha nan propio negoshi.
Na final cada participante lo desaroya nan plan di negoshi y plan financiero y lo haya e oportunidad pa presenta nan propio idea di un producto/servicio durante e “Pitch Event”.
Banda di e Qreative Business Academy, Minister Geoffrey Wever ta tuma diferente otro pasonan hunto cu partners strategico pa desaroya e industria creativo na Aruba. Desde augustus 2023, riba peticion di Minister Wever, Conseho di Minister a duna aprobacion di e nota di maneho “Development of the Orange Economy in San Nicolas”. A organisa na mei 2024 e prome Orange Economy Symposium na San Nicolas y a haya diferente input di participantenan na e simposio. Basa riba e input ricibi durante e simposio, Minister Wever a anuncia cu hunto cu Qredits Aruba lo bay ofrece e Qreative Business Academy pa duna e comerciante creativo e guia con pa habri y expande un negoshi. Adicionalmente Departamento di Asuntonan Economico lo continua pa ofrece e Creative Entrepreneur Workshops como parti di e maneho economico.
Tambe tin un Creative Entrepreneurship Fund den preparacion y tambe tin un colaboracion hunto cu Hulanda por medio di e Landspakket tema economia, pa traha riba e industria creativo. Go Cultura Foundation tambe ta un partner strategico den desaroyo di industria creativo na Aruba. Lo sigui duna mas informacion riba e pasonan concreto cu ta tuma pa desaroya e industria creativo na Aruba.
“Crea sectornan economico of diversifica nos economia di manera diligente ta tuma su tempo y preparacion. Mi ta kere den e potencial di e industria creativo como otro pilar importante di nos economia. Mi ta desea e participantenan di e Qreative Business Academy hopi exito. Tambe mi ta gradici Qredits Aruba pa ta un partner strategico den e desaroyo di industria creativo na Aruba”, Minister Geoffrey Wever a expresa den un comunicado di prensa.
