Quiana Cronie: “Bin for di un isla chikito no ta limita con grandi bo por soña”

Manera nos a comparti anteriormente, pueblo di Aruba a sinti hopi orguyo recientemente ora cu a anuncia cu un hoben local di nos isla, Quiana Cronie, a yega e logro grandi di ricibi e premio Rising Star Award.

E logro aki no solamente ta trata recepcion di e premio, sino tambe e oportunidad di representa nos isla riba escenario internacional y di alto nivel na New York Fashion Week, halsando di nos isla stima mientras e ta hiba su carera na e proximo nivel.

Bon Dia Aruba a haya e oportunidad di papia cu Quiana y den edicion recien a cuminsa comparti e storia di e persona di e gran talento cu nos ta mirando.

Diseno ta un di e varios forma cu arte tin y cu esaki ta bin inspiracion. Pa Quiana, el a comparti cu inspiracion semper ta cuminsa cu un storia. “Mi ta investiga narativanan lubida of ignora, specialmente di piscadornan, agricultornan, muhenan trahado Arubano y bida diario. Mi ta separa e storianan aki den emocion, simbolo, color y material y despues ta traduci esaki na paña.

Inspiracion ta forma un parti clave di arte, y mas ora ta trata di diseña paña. Ora cu e inspiracion aki ta sinti blokia, Quiana ta “reconecta cu su alrededor: naturalesa, cultura, combersacionnan, of simplemente regresa Aruba. E isla tin un manera di reset mi creatividad. Tuma un espacio for di trabao, observa textura, color y movecion hopi biaha ta trece claridad back.”

Un dia den bida di Quiana

“Un dia den mi bida como diseñadora ta hopi ancra riba realidad. Ainda mi ta tin un trabao tradicional durante siman pa asina mi por sigui inverti den mi marca Cashaca. Riba e dianan cu mi ta traha, mi ta yega cas, come, baña y bay traha back di biaha enfoca riba Cashaca. Mi anochinan mi ta pasa ta plania e lunanan di adelanta, contestando email y bay back den investigacion.

Mi no ta sketch hopi cu pen y papel. Na luga di esey, mi ta prefera crea prototipo fisico di papel, crea ‘mood board’ y desaroya pinturanan tecnico riba mi laptop. Tambe mi ta sigura cu mi ta keda involucra den tur aspecto de bes en cuando, pa mi keda conecta na mi trabao y sigui crea ideanan nobo. Durante e proceso, mi ta puntra mi mes constantemente: “E paña, color y material ta honra e storia? Nan ta sinti honesto? Mi dianan hopi biaha ta caba cu plania e tareanan binidero y crea deadline pa mi dianan off.

Banda di construi e marca, mi ta prepara di adelanta pa proyectonan den teatro y peliculanan cortico. Mayoria di mi aña ta prepara lunanan adelanta, y mi ta pasa hopi tempo den reunionnan cu creativonan cu ta inspirador y tin mesun pensamentonan cu ami. Nos ta intercambia opinion, nos ta desafia otro y crece hunto. Mi ta hopi intencional tocante colaboracion y ta scoge di traha solamente cu esnan ken su balor ta alinea cu di mi.

Ora cu mi haya tempo liber, mi ta purba di ta completamente presente. Mi ta stima sali come cu mi amigonan y famia y pasa tempo di calidad cu otro. Ora cu mi ta na Aruba, ta den naturalesa ta yuda mi reconecta sea pa medio di bay lama, buceo cu mi amigonan of bay hike. E momentonan aki ta esencial, specialmente ora bo ta maneha tanto proyecto na mesun tempo.

Te ainda tin hopi pa saca afo, for di refina e sistema di produccion te determina unda mi piesanan por ta traha na Aruba. Tambe mi ta nabega logistica, manera shipping y empake. Na mesun tempo, mi ta trahando riba un website cu un diseñador di website talentoso di Aruba, ademas di desaroya un revista y un pelicula cortico. Usualmente tin varios proyecto na mesun tempo, pero tur ta forma parti di e mesun vision.”

E nificacion tras “Sopi Aw’i Playa”

E coleccion Sopi Aw’i Playa ta haya su nomber for di e plato Arubano stima, cual tin mas di 200 aña ta pasa di generacion pa generacion na Rancho, un di e isla su pueblonan di pesca mas bieu. “Manera e plato, e coleccion ta uni storianan, textura y herencia, reflehando Aruba su historia cultural rico,” Quiana a splica.

“Cashaca SS25 ta honra e isla su muhenan, agricultornan y piscadornan trahador. Inspira pa T-shirtnan ‘straight cut’ di añanan 1860 crea cu saco di hariña, e coleccion ta reimagina paña di traha pa awendia … Cada trahe ta conta un storia, conectando audiencianan na Aruba su tradicionnan mientras cu ta celebra su identidad den evolucion.”

Pa cu su strategia personal di con e ta trece tur e ideanan aki na bida, Quiana a splica cu e ta mira cada look como un storia visual, guiando escogencianan den color, forma, detaye, acesorio y sitio pa photoshoot. Algun di e piesanan ta enfatisa temanan cultural y social, honrando tradicionnan mientras ta refleha riba turismo y comercialisacion. Trece e coleccion na bida ta involucra investigacion, experimentacion y colaboracion. Cada piesa a bira un personahe den un storia mas grandi, conectando pasado y presente mientras ta celebra Aruba su cultura vibrante.”

Manera a menciona anteriormente, Cashaca lo representa nos isla riba escenario di alto nivel na New York Fashion Week. Pa cu esaki nos a puntra Quiana con e preparacionnan ta andando, y el a comparti cu “preparacionnan pa New York Fashion Week ta intenso pero increiblemente emocionante. Aworaki, e enfoke ta riba refina e narativa, finalisa e paña y sigura cu cada elemento visual ta alinea cu e storia cu mi kier comparti. NYFW no ta djis un plataforma pa mustra moda – e ta un oportunidad pa representa Aruba su cultura riba escenario global.”

Pero e storia di Cashaca no ta caba aki. E siguiente expansion pa Cashaca ta bay mas aleu cu moda, manera “mueble, formatonan pa conta storia y hermentnan educacional. Despues di e show, mi tin plan di tuma un break di presenta y enfoca riba investigacion, finalisa e website y desaroya sistemanan pa produci y haci e pañanan disponible pa cumpra, incluyendo pakete. Tambe mi kier bay back na cada piesa, garantisando cu cada un ta crea cu e calidad mas halto den diseño y construccion.”

Sigur un inspiracion no solamente pa hubentud pero pa henter pueblo Aruba, Quiana ta laga nos cu un mensahe; “Confia den bo curiosidad y no apresura e proceso. Bo background, cultura y experiencianan personal no ta limitacion; nan ta nos forsa mas grandi. Keda habri, keda siña y tuma riesgo, hasta ora e caminda no ta cla. Cuminsa cu algo cu ta hala bo interes, experimenta y keda construi riba esaki gradualmente. Via e proceso aki, bo ta descubri kico realmente ta resona cubo y unda bo pasion ta. Semper refleha riba bo balornan como un creativo, skirbi e palabranan clave cu ta defini nan y laga nan guia bo trabao. E proceso di diseño no ta linear; Mi ta wak e manera un circulo: Experimenta, investiga, crea, refleha y cuminsa atrobe.”

“Bin for di un isla chikito no ta limita con grandi bo por soña.”