Den e caso cu Jan De Ruijter y fundacion Nos Ta Aruba a entama contra e bufete di abogado Croes/Wever/Ruiz cerca Raad van Toezicht op de Advocatuur (Conseho di Supervision pa Abogacia), tocante e incidente durante un rueda di prensa dilanti e bufete menciona, e persona Jan De Ruijter a haya parcialmente razon den e kehonan cu el a trece dilanti contra actuacion di dicho bufete.

Di otro banda, e Conseho a rechaza algun interes di e fundacion den e caso, y tambe interes di banda di sr. De Ruijter pa loke ta stroba e rueda di prensa y e supuesto conflicto di interes den actuacion di e bufete.

Dia 20 di november 2020 Fundacion Nos ta Aruba a organiza un rueda di prensa dilanti e bufete di Croes/Wever/Ruiz, unda entre otro tabata presente sr. De Ruijter. Dado momento un empleado di e bufete a sali di e oficina y a cruza caya bin atende De Ruijter riba un cuenta pendiente como cliente di e bufete, pa un caso cu nan a atende pa De Ruijter, y pa cual tabatin un suma grandi habri, segun e bufete. E rueda di prensa a continua, despues cu prensa por a filma ampliamente e sucedido, y despues tanto De Ruijter como e fundacion a entama e caso concerniente.

A trece dilanti tres keho: 1) cu e bufete a viola secreto di cliente; 2) a stroba e rueda di prensa intencionalmente; y 3) a comete conflicto di interes.

E Conseho no ta haya cu e fundacion tin un interes den e promer punto, y ta considera tambe cu e interupcion di e rueda di prensa tabata di corto duracion y no tabata di tal indole, cu esey ta algo funda pa un keho cerca e Conseho. Di otro banda, e Conseho ta haya cu de Ruijter no tabatin interes como persona den e rueda di prensa di e fundacion y por lo tanto ta inaccesible (niet ontvankelijk) pa e parti aki.

E aspecto cu si e Conseho a honra ta e violacion di secreto di banda di e bufete. Conseho ta bisa cu e bufete ta responsable pa tur nan personal, y mester percura cu semper cu e obligacion di mantene secreto ta conta pa tur empleado. Den esaki no ta haci distincion entre personal cu ta abogado of no.

Di banda di e bufete a ofrece disculpa, tanto den nan escrito di defensa como personalmente durante e audiencia den cual a trata e caso. Di parti di e bufete a trece dilanti cu ‘algo a kibra’ (“iets is geknapt”) cerca e empleado cu a haci cu el a bay enfrenta e persona dilanti e oficina. Sin embargo, e Conseho no ta bay di acuerdo cu e splicacion ey, considerando cu tabatin otro forma di atende e asunto, y cu ademas e empleado anteriormente lo a yama De Ruijter caba tocante e factura, cu De Ruijter ta rechaza.

E conseho ta conclui cu e bufete, particularmente e dos abogadonan Croes y Ruiz, ta responsable den e caso aki. E Conseho ta haya tambe cu e disculpa di Croes, duna bao condicion cu e comportamento ta reprochable den sentido di ‘tuchtrecht’, no ta suficiente. Esey segun e Conseho ta duna muestra cu aparentemente e no ta consciente di e hecho cu, sin un accion den cuadro di tuchtrecht, tambe e lo mester a haya cu e accion tabata reprochable. Ademas cu e disculpanan a ser haci den intimidad di un audiencia cera di e Conseho. Esey no ta husto ya cu e violacion di e secreto a tuma lugar dilanti camara ‘live’ di un rueda di prensa.

Por lo tanto e Conseho ta yega na un sancion di abogado Croes di un ‘berisping’ y un sancion di ‘waarschuwing’ pa abogado Ruiz.