Den e conseho di Consultorio Consultativo (Raad van Advies) riba e presupuesto 2017 por lesa cu ainda no a logra drecha e financia di e fondonan social AZV y SVb.
E pronostico pa 2016 y 2017 ta mustra cu e gastonan di AZV lo sigui subi mas duro cu su entradanan. Aunke a introduci e impuesto nobo di BAZV esaki no yuda cera e buraco y Pais Aruba atrobe mester cubri e deficit. E contribucion financiero di Pais Aruba ta keda aumenta pa 88.2 miyon na 2019 y 2020, segun gobierno den e presupuesto 2017.
E posicion financiero di e fondo di siguro di malesa di SVb ta keda preocupante, segun Consultorio Consultativo. E aña aki a hisa e premieloongrens (nivel di prima). Pero esaki no ta yuda pa cera un buraco di 4 miyon florin cu awor mester bin for di e otro fondonan tambe. E organo consultativo ta comenta cu e medidanan tuma ainda no duna e resultado positivo pa asina e fondo por maneha su mes financieramente. Parti di e problema ta cu segun e organo e gastonan di maneha e fondo ta halto relativamente. Baha e gastonan aki siguramente lo yuda pa drecha e fondo, asina Consultorio Consultativo ta bisa.
Nan ta mencion cu e gastonan di mantencion di e fondo di cesantia y esun pa accidente tambe ta hopi halto. E organo consultativo ta puntra su mes e ora (atrobe) con leu SVb ta cu medidanan pa maneha e fondonan mas eficiente. Den e tabla riba e pagina aki por mira e desaroyo di e gastonan di e fondonan cu ta cay bou SVb.
