No solamente gasto di personal di Gobierno ta subi na 2022, pero locual ta mas yamativo ta cu e gasto di producto y servicio ta hasta mas halto compara cu e periodo prome cu COVID-19. Y Raad van Advies no ta haya cu Gobierno a duna splicacion pakico, ademas cu e ta contra e palabracion cu mester baha gasto di personal segun e acuerdo haci cu Hulanda.

Esaki ta parti di e consehonan cu Raad van Advies ta duna riba e proposicion di Presupuesto 2022, e ley cu ainda Parlamento mester trata.

Gasto di personal ta aumenta na 2022 cu 7.5 miyon florin, segun e proposicion di ley di Presupuesto 2022. E aumento por keda splica cu eliminacion parcial di e recortenan salarial. Pero Raad van Advies ta corda Gobierno cu a palabra cu Hulanda pa bin cu un reduccion structural di gastonan di personal na un nivel aceptabel y duradero. Es mas, den e programa di gobernacion tambe a pone na e punto di accion Maneho Financiero, cu ta bay traha riba rebaho structural di gasto di personal. Sinembargo, Raad van Advies ta constata cu e reduccion aki no ta parce di lo keda realisa na 2022.

E intencion ta pa corta e recorte di solidaridad cu mita, y cu esaki lo contribui na aumento di gasto na un balor di 17.6 miyon florin, cu ta inclui e 7.5 miyon florin di gasto di personal y 10.1 miyon na subsidio. E sumanan aki sinembargo no ta cuadra cu e sumanan di e recorte, segun Raad van Advies. Tampoco no ta cla si e cortamento di e recorte ta conta pa henter e aña administrativo di 2022 of unicamente pa un parti di e aña. Raad van Advies a pidi pa e splicacion keda amplia cu un argumentacion tecnico, cu cifra, riba efecto di e cortamento di e recorte riba tanto e gasto di personal y subsidionan.

Como cu e recorte di solidaridad tin un caracter temporario, Raad van Advies ta puntra cua ta e intencionnan di Gobierno pa cambia esaki den un reduccion structural di gasto di personal. E splicacion di e ley no ta duna ningun claridad di solucionnan concreto. Aunke cu e obhetivo stipula di e norma di gasto di personal di 10 porciento di e Producto Interno Bruto, GDP, ta mustra realisabel pa 2027, Raad van Advies ta enfatisa cu den bista di e curso di finanzas publico y su durabilidad, e reduccion di gasto di personal ta crucial. Como tal Raad van Advies ta di opinion cu no mester tuma como punto di salida e maximo permiti, esta e 10 porciento di GDP, sino maximo di e suma cu ta necesario pa ehecuta e tareanan nucleo di Gobierno.

Pa Raad van Advies, tampoco e ta cla con leu a inclui e gastonan di personal di e Fondo di Presupuesto Interino Sociaal Crisisplan, IBSCP, den e totalidad. Aunke cu e informacion riba e proposicion di e ley di Presupuesto no ta bisa nada riba esaki, e programa di Gobierno si ta menciona e Sociaal Crisisplan explicitamente. Como tal, Raad van Advies ta conseha pa amplia e splicacion di e ley di Presupuesto 2022 cu e IBSCP y splica den ki forma e fondo aki lo keda existi den e proximo añanan y ki efecto e lo tin pa e gastonan di personal di Gobierno.

Gobierno ta bisa cu no a amplia e espacio di vacatura, conforme e recomendacionnan di College Aruba financieel toezicht, CAft. Sinembargo no ta splica con ta bay ekipa e departamentonan nobo di Gobierno, particularmente cu nan no ta aparece den e splicacion detaya pa cada departamento, servicio. Como tal, e organo consultativo kier sa con ta bay yena e departamentonan nobo aki y si e salario di e personal pa e entidadnan nobo aki ta inclui den henter e suma di gasto di personal cu a presupuesta pa 2022.

Producto y servicio

Cifranan cu Gobierno a inclui den su proposicion di Presupuesto 2022 ta mustra un aumento drastico den e gasto pa producto y servicio. No solamente den comparacion cu 2021, sino tambe den comparacion cu añanan anterior.

No ta posibel pa haci un analisis di costo pa cada Ministerio, mirando cu esakinan pa 2022 ta hinca den otro compara diferente compara cu otro añanan. Pero den luz di e situacion actual di finanzas publico, Raad van Advies ta considera cu e aumento di gasto di producto y servicio como algo preocupante. E conseho enfatico ta pa Gobierno baha e gastonan aki y trece nan na e liña prome cu e periodo di COVID-19.

AZV

Aunke cu deficit di AZV ta calcula na 35.3 miyon pa 2022, no a presupuesta un contribucion di Pais Aruba na e fondo. Esaki pa stimula e autosuficiencia financiero di AZV, Gobierno ta splica. Pero, Raad van Advies ta haya e ponencia aki yamativo ya cu pa ley Gobierno ta obliga pa contribui financieramente na momento cu tin deficit. Pa tal motibo, Gobierno mester inclui e deficit di AZV den Presupuesto 2022.

E organo consultativo ta di opinion cu e responsabilidad pa tuma medida pa reduci gasto den cuido no ta keda unicamente na AZV, pero tambe cerca Gobierno. Aki no ta trata unicamente pa Gobierno mes tuma medida, pero e instrumentonan legal cu Gobierno ta duna AZV pa logra su obhetivo. Como tal, Raad van Advies ta puntra kico ta e status di e plan di cuido ‘Cuido di nos Cuido.’ Na momento cu a traha e rapport aki, a envolvi henter e sector di cuido. Ta Gobierno a lanta e comision aki y a produci su rapport di recomendacion. Den e rapport aki a bin cu proposicion di reforma cu a largo plaso lo produci reduccion grandi den e gastonan di cuido.

Mas ainda, Gobierno meter indica na ki forma a tene cuenta cu e palabracionnan haci cu Hulanda riba recorte riba gasto di cuido. Recientemente AZV a haci proposicionnan concreto y ta di gran balor pa Gobierno cuminza tuma accion, segun Raad van Advies.

Banda di e reduccion di costo den cuido cu ta necesario, tambe mester tene cuenta cu e mutacion di COVID-19. E ta mustra cu COVID-19 a bira endemico en bes di epidemico. Den otro palabra, COVID-19 lo no desaparece. Esaki tin consecuencia pa con ta hinca cuido den otro, a termino largo y corto. Raad van Advies ta puntra si Gobierno a tene cuenta cu e cambio di caracteristica di COVID-19 y si por pone e consecuencianan financiero riba mapa.

Mirando cu a pone salud como un indicador pa sostenibilidad, Raad van Advies ta kere cu Gobierno como tal tin un responsabilidad mas grandi pa efectua aspectonan di e plan di cuido of bin cu medidanan di ahuste alternativo pa asina duna un contribucion na reduccion di e asina yama ‘landsbijdrage’ y sostenibilidad di e structura di cuido. Raad van Advies ta enfatisa aki cu esaki ta esencial den bista cu presion di embehecimento unicamente lo sigui aumenta.