Aruba tin su ROPv, esta e Plan di Ordenanza Teritorial cu regla, pero asina mes, e Minister encarga tin tur autoridad pa haci cambio den e reglanan.

Aunke cu Raad van Advies ta sostene e Ordenanza Teritorial cu regla, e instituto ta preocupa cu su ehecucion. E documento, esta e Ruimtelijke Ordenings Plan met voorschriften ta un serie di regla cu ta mara ciudadano y Gobierno den forma con ta anda cu espacionan na Aruba. Pero manera Raad van Advies a bisa den su analisis, ainda Minister di Ordenanza Teritorial, Infrastructura y Medio Ambiente lo por trece cambio den e reglanan, sin cu ta hopi cla na cua condicionnan e mester cumpli pa haci decision.

Raad van Advies a señala algo area cu e ta mira cu tin cierto problema pa cumpli, particularmente si no tin un control stringente riba ehecucion di e reglanan.

Por ehempel, den articulo 4.2 di e reglanan, a determina cu uso di un cas (residencia) pa negoshinan cu ta mara na e cas ta permiti bou cierto circunstancia. Un di e condicionnan ta cu no ta permiti pa ricibi cliente of bishitante despues di 7’or di anochi. Sinembargo, e regla aki ta mustra caba di ta dificil pa cumpli cune y Gobierno mester splica den su ilustracion di e ley, con ta tene cuenta cu e regla aki. Manera ta conoci, tin hopi cas cu ta ademas base di actividad comercial di e doño, residente.

Minister por haci cambio

Tambe e ley ta permiti e Minister bou condicionnan specifico pa cambia e destinacion y reglanan di e ROPv. Ta asina cu e Minister di Ordenanza Teritorial, Infrastructura y Medio Ambiente, a base di articulo 7.6 di e reglanan por haci cambio di e tal y bin cu reglanan di construccion nobo pa casnan y apartamentonan residencial nobo, como tambe e reparticion di tal riba e categoria di biba y areanan. Un cambio asina lo por sosode unicamente den cuadro di un desaroyo balansa di e capacidad di construccion di cas y vivienda na Aruba.

Contrario na tur e otro reglanan di cambio, no ta determina aki cu mester tene cuenta explicitamente cu e clima di vivienda y di biba, y cu e balornan natural, ecologico, di paisahe, arkeologico of di cultural historico. Mesun cos ta conta pa loke ta e autoridad pa haci cambio den determina e cantidad maximo di unidadnan di estadia recreativo den su totalidad, den cada area specifico, of parti di e area y e autoridad pa cambia e destinacion y reglanan di e ROPv pa construccion di tiendanan mega. Raad van Advies ta bisa cu pa adelanta, no ta cla pakico un designacion pa e consecuencianan pa e balornan residencial, natural, ecologico y otro no ta prescribi den e preparacion di un decision di cambio, a base di e mesun articulonan. Raad van Advies kier splicacion di e decision aki.

Conseho ta conta?

A base di articulo 7.10 di e reglanan den e ROPv, e Minister ta autorisa pa cambia e designacion y reglanan si haya un peticion pa esaki y cu por conduci na un decision irevocabel pa pago di daño. E stipulacion aki mester haya miho splicacion, segun e organo consultativo cu ta bisa cu berdad e posibilidad pa exigi daño ta limita pero no mester exclui e posibilidad. Pa e motibo aki lo ta deseabel pa e Minister tin e autoridad pa trece cambio den e ROPv den caso cu e reglanan berdad por conduci na exigencia di daño di perhuicio. No a pone mas limitacion riba e autoridad aki, aunke cu mester sigui e procesonan describi pa cambia e ROPv.

Locual no ta cla cua ta e circunstancianan cu por conduci na daño di planificacion cu ta e unico base cu ta relata na e autoridad di cambio den e reglanan compara cu e vision di e ROP pa yega na un organisacion duradero di Aruba. Raad van Advies ta bisa cu e ROPv como tal ta e garantia huridico pa e diseño duradero di Aruba. Raad van Advies ta sali di e punto di bista cu a tuma tur consideracion prome cu a yega na e ROPv. Como tal, e ta consehabel pa inclui criterianan mas amplio, como duna mas splicacion den cua caso e Minister lo por haci uso di su autoridad pa trece cambio den e ROP y ROPv.

Prome cu e Minister trece cambio sinembargo, e mester busca conseho for di e organo cu ta inclui DIP, DOW y otro actor envolvi pa mira cua ta e interesnan mara na e posibel cambio di e regla. Ta den e seno di e asina yama ‘omgevingstafel’ ta discuti tur e proposicionnan y ta duna e Minister un conseho final. Raad van Advies kier sa si e opinion di e Conseho di Ordenanza Teritorial tambe ta forma parti di e ‘omgevingstafel,’ of cu ta despues ta pidi conseho adicional di e organo aki cu a lanta pa conseha riba e creacion di e ROPv. E papel di e Conseho di Ordenanza Teritorial den caso cu e Minister kier haci cambio no ta bon splica, segun Raad van Advies.

E Minister por tuma decision sin haya conseho di DIP, DOW y otro comisionnan si esakinan tuma mucho tempo. Pero den e mesun ROPv no ta menciona e organisacionnan cu ta forma parti di e ‘omgevingstafel.’ Raad van Advies ta puntra su mes di esaki ta nifica cu e Minister encarga por tuma su decision sin haya conseho di e organo menciona den e propio ROPv.

Deporte acuatico

Basa riba articulo 23.3, segmento b di e reglanan e ta prohibi pa haci uso di medionan dirigi na deporte acuatico na e parti turistico pariba di Aruba cu ta di importancia pa e area. Motibo di e decision aki ta cu e lama ta na frontera di e area cu ta indica como Parke Marino. P’esey mes Raad van Advies ta puntra di con no a considera un prohibicion di e ekiponan aki den e area como suficiente.

Horeca

Tambe ta permiti restaurant, bar y cafe den hopi area cu ta reserva pa destinacionnan specifico, incluso areanan manera naturalesa y paisahe, aunke cu nan ta limita na camindanan principal. Pa loke ta e area designa Centro di Oranjestad a inclui reglanan adicional. Horeca ta unicamente permiti den oranan di dia y anochi, y e Minister por duna aprobacion pa actividadnan den marduga. Pa loke ta centro di San Nicolas, a inclui un regla adicional cu horeca den ora di marduga ta unicamente posibel den e area di entretenimento. Consecuentemente, Raad van Advies ta bisa cu no ta determina si den e area turistico di costa West di Aruba ta permiti horeca den oranan di marduga tambe, sea cu of sin dispensacion di e Minister.

Conclusion y conseho final

Raad van Advies ta preocupa cu ehecucion, supervision y implementacion di e ROPv ta bay ta dificil. E reglanan ta surpasa diferente area di maneho y mirando e envolvimento di diferente minister, servicio y departamentonan publico, como tambe organisacionnan, mester tin proceduranan fiho y cla. Esaki pa Evita cu ta bin fragmentacion y hasta trabou dobel. Un procedura cla lo permiti un miho acoplacion di e tareanan describi den e ROPv.