Pa hopi pais den desaroyo, incluyendo paisnan menos desaroya, estadonan insular chikito den desaroyo (small island developing states, SIDS), paisnan na Africa y di economia mediano, turismo ta constitui un fuente mayor di entrada, divisas, entrada di impuesto y empleo. Pasobra turismo ta conecta persona cu naturaleza, turismo sostenibel tin e capacidad unico di stimula responsabilidad ambiental y conservacion.
Turismo sostenibel, incluyendo ecoturismo ta un actividad multi-sectorial cu por contribui na tur tres dimension di desaroyo sostenibel y pa logra e Obhetivonan di Desaroyo Sostenibel (sustainable development goals, SDGs) fomentando crecemento economico, mitigando pobreza, y crea empleo pleno y productivo y trabou decente pa un y tur.
Turismo tambe por contribui na acelera un cambio pa patronchi di consumo y produccion mas sostenibel, promove uso sostenibel di oceano, lama, recurso marino, promove cultura local, mehora calidad di bida y empodera economicamente hende muher y hoben, pueblo indigena y comunidad local y promove desaroyo rural y mihor condicion di bida di poblacion local, incluyendo di criador di bestia y agricultor familiar.
E utilisacion di turismo sostenibel y resiliente como un herment pa fomenta un crecemento economico sosteni y inclusivo, desaroyo social y inclusion financiero, ta facilita formalisacion di e sector informal, promocion di mobilisacion di recurso domestico, proteccion ambiental y eradicacion di pobreza y hamber, incluyendo e conservacion di biodiversidad y recurso natural y e promocion di inversion y gestion empresarial den turismo sostenibel.
Dia Mundial di Resiliencia di Turismo (17 februari) a ser proclama pa e Asamblea General di Nacionan Uni mediante e resolucion A/RES/77/269 y ta boga pa enfatisa e necesidad pa fomenta e desaroyo di un turismo resiliente pa por maneha choque externo, teniendo na cuenta e vulnerabilidad di turismo pa emergencianan. E tambe ta un yamada pa Estado Miembro pa desaroya strategia nacional di rehabilitacion despues di disrupcion economico, incluso mediante cooperacion publico-priva y e diversificacion di actividad y producto.
2027 Aña Internacional di Turismo Sostenibel Y Resiliente
Na februari 2024, e Asamblea General di Naciona Uni a dicidi di proclama 2027 como Aña Internacional di Turismo Sostenibel y Resiliente mediante resolucion A/RES/78/260.
E ta encurasha tur estado, Nacionan Uni y tur otro actor pa probecha di e Aña Internacional pa promove accion na tur nivel, incluyendo via cooperacion internacional, y pa sostene turismo sostenibel y resiliente como forma di promove y acelera desaroyo sostenibel
Naciona Uni a encarga UN Tourism cu e implementacion di e Aña Internacional di Turismo Sostenibel y Resiliente.
Februari 2, 2026 a presenta oficialmente e “Roadmap to the International Year of Sustainable And Resilient Tourism” na e organisacion UN Tourism di Nacionan Uni.
E Road Map ta producto di un proceso colaborativo, y ricibi cu entusiasmo pa e Comite pa Turismo y Sostenibilidad (CTS) di UN Tourism.
E Aña Internacional di Turismo Sostenibel y Resiliente lo permiti UN Tourism, como organisacion principal internacional di turismo, apoya Estado Miembro den posiciona turismo como un berdadero sector transformativo pa e agenda post-2030.
Algun instrumento di UN Tourism pa utilisacion pa accion den e Aña Internacional ta e Un Tourism Data Dashboard, e Tourism Statistics Database y e plataforma Tourism4SDGs (https://www.tourism4sdgs.org).
Situacion di turismo sostenibel y resiliente na Aruba
E situacion actual na Aruba pa cu desaroyo di turismo no ta sostenibel ni resiliente.
E proceso pa e Dialogo Nacional pa Desaroyo Sostenibel basa riba e documento “Transforming our world: The 2030 Agenda for Sustainable Development”, cual ta defini e 17 Obhetivonan di Desaroyo Sostenibel (SDGs) y 169 meta concreto pa realisa, inicialmente a ser ricibi cu hopi entusiasmo pa Gabinete Mike Eman II, cu a crea un Comision Nacional pa SDGs cu den su fase inicial hasta a ser duna apoyo di UNDP pa Aruba sirbi como pais piloto y Aruba a conoce un Center of Excellence for Sustainable Development of SIDS crea dor di Reino Holandes y UNDP na 2015.
Na 2017 e actividadnan di e Comision Nacional pa SDGs poco poco a cuminsa mengua y den e periodo 2017-2025 e Center of Excellence for Sustainable Development for SIDS a ser elimina y accion nacional pa SDGs a cay den otro.
Rainbow Warriors Core Foundation a yuda crea e SDGs mediante e federacion di 1300 NGOs yama Beyond 2015 y como actual miembro di e federacion internacional pa promove e SDGs Together 2030 a participa den e 4th UN Conference on SIDS teni na 2024 na Antigua y na e 3rd UN Ocean Conference teni na Nice, Francia na 2025, na cual ultimo conferencia ningun delegado di pais Aruba tawata presente.
Den un reunion sosteni cu Prome Ministro Eman, 13 februari 2026, nos a haña e baño friu di e comentario cu lo prefera e Dialogo Social y e ideologia di Bon Comun como substituto pa e Dialogo Nacional pa Desaroyo Sostenibel segun SDGs.
Ademas e documento Corporate Plan 2026 di Aruba Tourism Authority y su proyecto pa Regenerative Tourism y uso di Responsible Tourism Impact Report ta desvia completamente di e Dialogo Nacional pa SDGs stipula pa Nacionan Uni cu mester ta basa riba “Participation of all Stakeholders in decision-making for sustainable development leaving no-one behind”.
E documento di Nacionan Uni “Stakeholder Engagement and the 2030 Agenda: A Practical Guide” ta mustra bon cla cu Aruba no ta siguiendo NINGUN guia pa maneho di desaroyo sostenibel di Nacionan Uni.
Rainbow Warriors Core Foundation despues di a participa den e dos conferencia menciona a logra di crea un red extenso di colaboracion pa desaroyo sostenibel entre islanan den Pacifico, Africa y Caribe.
Y nos lo reinicia e Dialogo Nacional pa Desaroyo Sostenibel segun SDGs involucrando e Major Groups and Other Stakeholders (piscador, agricultor, criador di bestia, aquacultor, hende muher, mucha y hubentud, comercio y industria, trahador y sindicato, comunidad cientifico y tecnologico, NGO, y personanan cu descapacidad).
Pronto lo anuncia mas riba e tema aki y lo elabora con lo cuminza prepara e Dialogo Nacional pa SDGs aki cual lo conta cu sosten internacional di Union Europeo y Nacionan Uni y cu lo sirbi pa duna contenido na actividad den cuadro di Aña Internacional pa Turismo Sostenibel y Resiliente 2027 basa riba SDGs segun e normativa stipula dor di Nacionan Uni.
