Raiz di criminalidad bou hoben ta problema social segun e fundacion

Stichting Reclassering tin diferente proyectonan cu como meta pa tene un miho control riba hobennan cu ta haya nan mes den problema cu husticia. Pero mas aleu tambe ta purba corta e problema pa medio di bin cu solucionnan pa e problemanan social cu ta causa e problemanan aki. Un proyecto cu e fundacion tin andando ta e mentorproject. Pero e fundacion keto bay ta elaborando proyecto manera e elektronische toezicht.

Segun directora di e fundacion Reclassering ta bogando pa basta tempo pa e proyecto elektronische toezicht cual nan ta spera lo keda implementa pronto. E proyecto ta encera cu lo cuminsa monitor personanan cu ta cay bou guia di e fundacion cu un banchi cu lo ta alertando e fundacion y husticia alabes via e fundacion riba e alocacion di e persona bou guia. Esaki ta pa por determina si e persona a sali ora e no tabata apropia pa sali. “Esaki ta conoci na Merca, Hulanda, Sint Maarten, Boneiro y Corsou pero Aruba nunca a implementa e sistema aki. Pero e ta hopi importante pa specificamente hobennan pa bo mira unda nan ta moviendo.”

E reto te ainda pa e fundacion specialmente cu e proyecto pero tambe en general ta e parti riba con e fundacion ta yega na fondonan. Manera nos a publica siman pasa e fundacion ta depende riba un parti di subsidio di gobierno hunto cu donacionnan y sponsorships particularmente pa e proyectonan cu nan ta elabora. E reto financiero no solamente ta wordo enfrenta na Aruba, si no na Sint Maarten tambe, unda ‘nan mester a cera e programa aki pa via di problema financiero pero actualmente nan kier cuminsa cu ne bek’.

Den terminonan practico e reto mas tanto ta pa por aloca e personal necesario pa keda monitor e personanan cu e banchi ora nan ta bisti esaki pa evita cu den caso di hobennan por ehempel nan no keda riba caya despues di nan ‘curfew’. Pero apart di e personal cu ta necesario pa monitor e persona ora un hoben ta kibra nan compromiso mester tin persona cu ta bay percura cu polis bay busca e persona. Tambe mester percura pa e banchinan y e sistema envolvi cu esaki wordo cumpra y integra den e organisacion.

Problema social ta causa di criminalidad bou hoben
Ora ta trata di prevencion, sra. Pemberton ta haya importante pa traha riba prevencion pero tin cu wak esaki di un manera mas amplio. Segun e directora e criminalidad bou hobennan en particular tin hopi di haber cu problema social. Pues si ataca e problema social aki e criminalidad bou nan lo consecuentemente baha. “Nos ta wak cu hopi hobennan no tin nada di haci despues di scol, circulonan di amistad cu nan ta anda cu ne ta negativo, e situacion financiero na cas y uzo di droga por tin hopi influencia riba si hobennan ta bin den problema cu husticia.”

Particularmente mester ataca e problema di uzo di droga bou hobennan, segun sra. Pemberton. “Mayoria di hobennan, nos ta papiando kinan di un 80 pa 90 porciento di nan cu ta cay cera ta consumi marihuana. Nan no ta wak esaki manera un droga pero e ta afecta nan manera di pensa y analisa pa nan por tuma bon decisionnan.” Segun e directora di e fundacion den tur e añanan di experiencia cu e fundacion tin nan ta mira cu den casonan unda hoben ta haci uzo di droga esaki ta conduci cu nan ta cay atras den nan estudio. “Nan ta cuminsa spijbel y nan ta bay riba caya. P’esey pa e hobennan aki Aruba no tin un bon ambiente ni manera con pa ataca e problema di hobennan adicto. No tin un luga residencial tampoco cu por tuma nan.”

Colaboracion cu partnernan di Reclassering den Reino
Manera nos a publica den pasado e fundacion tin un contacto estrecho cu e otro organisacionnan di Reclassering den Reino. Apart di Reclassering Hulanda cu a colabora cu Reclassering Aruba pa medio di duna training riba con pa handle cu casonan, e organisacionnan ta comparti informacion riba cierto casonan ora ta necesario. Esaki ta un training cu ta wordo duna na Hulanda riba con pa conscientisa hobennan cu a cay den problema cu husticia pa conscientisa nan riba e maneranan con nan por sali for di situacionnan fastioso. Segun e directora Aruba tabata e prome cu tabatin chens di haya e training aki na Aruba mes.

Un ehempel cu sra. Pemberton ta duna ta cu ora un persona cu ta biba na Aruba migra bay Hulanda y nan tabata bou guia di Reclassering, e file di e caso ta wordo manda pa Reclassering Hulanda pa asina nan sigui yuda e personanan ora nan establece eynan. Esaki ta pasa vice versa pa casonan ora personanan na Hulanda dicidi bin Aruba. Pues tin un bon contacto entre e organisacionnan, segun sra. Pemberton. “E informacion di e clientenan ta wordo traspasa pero mas tanto ta enfoca riba e metodologianan di guia cu a wordo uza.”

Ta haci falta di role models pa proyecto di mentor
Un proyecto di e fundacion cu a hala nos atencion en particular ta e mentorproject cu e fundacion ta ofrece na hobennan cu un strafblad. A bin cu e proyecto aki pasobra e fundacion a nota cu hopi biaha ora di guia hobennan bek na bon caminda nan no sa tende mucho di adulto of hende mucho mas grandi cu e hoben. “Pero si bo ta duna un hoben e hermentnan necesario pa sirbi como un role model pa otro hoben nos a ripara cu esaki ta hopi efectivo den conduci nan bek na bon caminda.”

Esaki segun e directora ta un manera cu e fundacion ta boga pa su metanan cual ta pa sigura e siguridad di comunidad. Pa esaki nan ta haya prevencion sumamente importante. “Pa personanan cu a comete un delito caba e meta ta pa guia nan di tal manera cu nan no ta bolbe comete un delito den futuro.”

Sinembargo e proyecto aki no ta mira mucho persona cu kier ‘volunteer’ pa ta un persona cu ta keda den contacto cu hobennan cu a bin den problema cu husticia. Esaki lo por ta pasobra ‘hopi hende no kier mas problema riba nan’. Alabes e fundacion a haya varios storianan di success cu e programa aki ora ta conecta un hoben cu bon curason na e otro hobennan cu ta pasando den mal situacion.

Loke e programa ta encera ta cu personanan cu interes pa bira role models ta acudi na e fundacion pa asina pasa un proceso di screening pa percura cu e personanan incorecto no drenta den hoben nan situacion dificil. P’esey ta evalua cada bes estrictamente e persona cu kier guia e hobennan. Pero e fundacion mes tambe ta busca personanan cu nan ta haya cu lo ta un bon ‘big brother or sister’.

“Mas tanto ora bo ta bira un mentor bo tin cu keda den contacto y check up riba e hoben regularmente. Pero e ta depende riba e situacion di e hoben y e tempo cu e mentor tin disponibel. Por ehempel tin di nos mentornan cu ta haci un actividad hunto cu e hobennan semanalmente. Te hasta nos tabatin algun persona cu ta core hunto tur dia por ehempel. E meta ta pa mustra e hoben cu tin persona dispuesto pa papia cu nan y pa evita cu nan malgasta nan tempo riba influencia negativo.”

You May Also Like

Fin di un siman agita; Awor trabao di goberna ta cuminsa

Ayera nochi a conclui un siman bastante agita di tratamento di presupuesto. Desde siman ...

5P3A3298.jpg

Pelea y sacamento di arma na Ponton a caba cu detencion

Diabierna anochi na Caya Ernesto Petronia caminda pa Ponton a surgi un discucion fuerte ...

Fundacion CineAruba: ‘Acceso na fondonan ta bira menos despues di tempo’

Fundacion CineAruba den aña nobo ta spera cu gobierno lo duna contesta riba nan ...

reef care2.jpg

Sitionan di piscamento y recreo riba beach ta produci hopi sushi ainda

Poniendo atencion riba e problematica di plastic riba beach, Aruba Reef Care Foundation ta ...

Ministerdi Salud Alex Schwengle

‘Cancer ta un problema mundial cu ta keda crece’

 Minister di Salubridad Publico, Dr. Alex Schwengle ta considera e tema di hemato-oncologia hopi ...

image.jpeg

Na e momentonan aki no tin situacion na Venezuela cu ta hustifica peticion pa asilo politico

A puntra Minister encarga cu husticia Arthur Dowers si hende yega illegal sea ta ...