Ocho di juli 2020, riba invitacion di prome minister Wever-Croes, lider di RAIZ, Ursell Arends, a participa den e cumbre politico pa wordo informa y discuti riba e condicionnan mas recien di gobierno Hulandes. Ta trata di condicionnan pa un siguiente prestamo den conexion cu e crisis di covid-19.

Democracia y integridad

For di e informacion ricibi, RAIZ por conclui cu gobierno di Hulanda kier crea un entidad Hulandes, cu miembronan nombra door di gobierno Hulandes, cu de facto lo bira un poder ehecutivo (un gobierno) riba nos gobierno. E entidad aki no lo duna cuenta na parlamento of pueblo di Aruba, pero solamente na minister di gobierno Hulandes. Y ministernan di gobierno Hulandes ta duna cuenta na Tweede Kamer, cu ta wordo eligi pa e ciudadano di Hulanda. E pueblo di Aruba lo keda sin voz democratico, mientras e entidad de facto por goberna riba nos pais. Un obhecion principal cu RAIZ tin cu e entidad proponi, ta cu e ta mina e derecho democratico di cada ciudadano di nos pais. Tin un falta profundo di responsabilisacion y checks and balances, cual ta principionan cu RAIZ ta para p’e y cu mester conta pa Aruba pero tambe pa Hulanda. Mientras gobierno Hulandes no lo tribi di mina e derecho democratico di su pueblo, gobierno Hulandes kier haci esaki cu e pueblo di Aruba, y tambe di Corsou y Sint Maarten.

Ademas, e proceso cu gobierno Hulandes ta encamina ta carece di principionan di bon gobernacion y integridad. No ta duna transparencia, no ta duna tempo rasonabel pa evalua algo asina drastico, y ta haci mal uso di e situacion vulnerabel cu Aruba ta aden (misbruik van omstandigheden). Esaki pa purba impone condicionnan cu ta surpasa cualkier principio di proporcionalidad. Pa fiansanan y reformanan durante un crisis mundial, mester tin espacio pa negocia. Loke no ta negociabel pa RAIZ, ta integridad.

Sosten

Durante e cumbre politico, Ursell Arends a expresa cu RAIZ no ta di acuerdo pa acepta e proposicion diabierna awo, pero pa negocia, cual espacio Aruba tin pa por haci. Prome minister Wever-Croes por conta cu sosten di RAIZ pa cu e posicion aki.

Union

Pa 34 aña cu nos Status Aparte, Aruba ta un pueblo dividi. Awo, Politiek Oranjestad mester uni pa defende e derechonan y bienestar di e pueblo di Aruba. Durante e cumbre politico, representantenan di otro partidonan tambe a expresa y demostra e union necesario. Awo ta keda na Politiek Oranjestad pa sigui practica e union aki, den bienestar di nos pueblo.

Constructivo

Movimiento RAIZ kier sigura pueblo cu RAIZ, y tambe otro partidonan, ta consciente cu nos realidad financiero y economico ta hopi precario y cu simplemente keda sin acepta loke politiek Den Haag kier impone, no ta un opcion. Aruba lo mester negocia y traha riba proposicionnan alternativo. Tambe RAIZ ta consciente cu nos pais pa decadanan no a wordo goberna manera mester ta, y cu nos tin cu implementa reformanan structural. Esaki ta e motibo di existencia di movimiento RAIZ. E reformanan necesario no por significa cu e derechonan democratico di e ciudadano di Aruba ta wordo mina. Ademas, no ta na su luga pa kita e oportunidad di e ciudadano, trahado, profesional y (futuro) politiconan di Aruba pa por determina e rumbo nobo pa haci nos pais uno mas responsabel, mas eficiente, y mas husto.

RAIZ lo sigui mantene un postura constructivo y colaborativo na bienestar di nos pais.

LEAVE A REPLY

Please enter your comment!
Please enter your name here