Riba rednan social ayera a circula ampliamente un video, den cual por mira un agente di polis y dos miembro di personal di seguridad di aeropuerto HATO na Corsou ta confronta un pasahero, y na dado momento, e polis ta dal e pasahero na su cara.
Medionan di comunicacion di henter Reino Hulandes a reporta riba e suceso, ya cu tabata trata di un popular rapper Hulandes, Josylvio, kende a confronta polis na e aeropuerto. Riba e video por mira con despues di un intercambio di palabra, e polis ta dal Josylvio, y seguidamente polis y e agentenan di seguridad ta procede pa aresta y boei e rapper, cu uso di forsa.
Segun medio di comunicacion Curasoleño, Curacao Chronicle, management di e rapper a confirma pa Shownieuws cu en berdad ta Josylvio den e video, pero a bisa cu ainda no ta cla kico precies a sucede y no ta conoci si e rapper ainda ta deteni.
Reportenan no confirma ta indica cu Josylvio a presenta un PCR test falso. Riba rednan social ta indica cu na momento cu no a lag’e pasa door di inmigracion, el a dirigi insulto racial contra e agentenan, motibo pa cual e polis a dal e.
