Rapport di evaluacion di menasa estatal Hulandes: Inteligencia Hulandes ta adverti cu Aruba ta directamente bao menasa di Venezuela

Aruba, Corsou y Bonaire ta ocupa un posicion strategicamente significante den un region cada bes mas marca pa instabilidad, competencia pa poder, y crisis humanitario. E edicion 2025 di e Dreigingsbeeld Statelijke Actoren (DBSA 2025), publica weekend ultimo pa Servicio General di Inteligencia y Seguridad Hulandes (AIVD), Servicio Militar di Inteligencia y Seguridad (MIVD), NCTV (Coordinador Nacional pa Anti-terorismo y Seguridad) y Ministerio di Interior y Asunto di Reino, ta subraya e red compleho di riesgo cu e teritorionan aki ta enfrenta, particularmente den contexto di e crisis persistente na Venezuela y e evolucion di dinamica di geopolitica global.

E balansa di poder global ta cambiando, y como resultado, Hulanda ta enfrenta mas incertidumbre y imprevisibilidad den escenario internacional. Estadonan cada bes ta mas dispuesto pa usa poder pa avansa nan interesnan, y Europa mester depende mas riba su mes pa seguridad y resiliencia. Esaki ta conclui di e DBSA 2025.

Pieter-Jaap Aalbergsberg di NCTV a enfatisa den un comunicado di prensa: “E evaluacion di menasa aki ta confirma cu nos na Hulanda no por keda inactivo. No ta un cuestion di si nos ta bay experimenta efectonan social disruptivo, sino na ki momento. Pues ta importante pa nos continua enfocando riba seguridad y resiliencia.”

DBSA2025 ta yega na un momento di turbulencia. Den ultimo dos aña, menasa di actornan estatal contra Hulanda a keda constante, pero e menasa di sabotahe a aumenta. Paisnan ta desplegando tactica manera spionahe (digital), intimidacion y desinformacion pa influencia sociedad Hulandes. A pesar cu un menasa militar directo contra un teritorio di NATO (Organisacion di Tratado Nort Atlantico) no ta probable, e presion riba seguridad nacional ta sin precedente.

Economia Hulandes ta profundamente vincula cu geopolitica. Dependencianan strategico – manera tecnologia critico y cadena di suministro – ta siendo usa como arma politico of economico. Varios estado ta purbando di adkiri conocemento y tecnologia Hulandes y Europeo, sea abiertamente of cubiertamente, den academia y sector priva. Esaki por tin consecuencia inmediato, posiblemente aumento costo di bida pa ciudadanonan Hulandes.

Segun Erik Akerboom, director general di AIVD: “Nunca antes nos tabata cuestiona asina hopi pa organisacionnan riba kico nan por haci pa protege hende y procesonan miho. Nan ta experimentando e consecuencianan di conflicto y disturbio. Hulanda ta un posible obhetivo [pa atake]. Ta p’esey nos ta alerta.”

E menasanan identifica por conduci na interupcion social, daño na infrastructura vital, y perdida economico. Particularmente alarmante ta sabotahe digital, cu por interumpi coriente, internet, sistema financiero of acceso na awa potable. E rapport ta adverti cu ta spera cu accionnan di sabotahe lo continua aumentando na Europa.

Venezuela: E menasa mas urgente pa Aruba

Den su seccion tocante menasa na e parti Caribense di Reino Hulandes, e rapport ta bisa cu, specificamente e islanan di Aruba, Corsou y Boneiro, ta continua siendo afecta directamente pa e situacion politico, economico y humanitario na Venezuela. “E relacion entre Hulanda y Venezuela ta keda tenso, en parti pa motibo cu Reino no a reconoce e victoria declara pa [presidente Venezolano, Nicolas] Maduro den eleccion presidencial 2024,” por lesa den e rapport.

E rapport ta nota cu ta considera “improbable cu Venezuela tin intencion di inicia un conflicto militar cu Reino” Hulandes, sinembargo, ta nota cu “e riesgo di escalacion no intencional ta existi pa motibo di e nivel relativamente abao di profesionalismo militar Venezolano.”

Ademas, e rapport ta nota cu aumento di instabilidad paden di Venezuela tambe por tin consecuencia pa Aruba, Bonaire y Corsou. “Esaki por manifesta den forma di migracion for di Venezuela na e islanan, of den actividad criminal a traves di e fronteranan.” Teniendo cuenta cu e nivelnan actual di migracion Venezolano ya ta poniendo presion riba e islanan, e rapport ta nota cu un fluho a gran escala por pone presion riba e stabilidad social y economia di e islanan aki. “Servicionan publico, manera facilidad medico y e sistema hudicial – ta di escala chikito y pa e motibo aki ta vulnerable riba e islanan. Un migracion masivo por abruma e servicionan esencial aki,” e rapport ta nota. Esaki mientras ta conoci cu na Aruba, e sistema di enseñansa y salud ya ta bao presion cu e poblacion existente; ademas, tin otro sectornan cu ta causa preocupacion, manera vivienda y infrastructura – y servicionan esencial manera ELMAR y RWZI – cu lo por collapse pa motibo di un fluho enorme di inmigracion.

En general, e evaluacion di menasa ta duna un bista di algun aspecto cu tin impacto riba Aruba – y e otro islanan di e parti Caribense di Reino Hulandes.

E menasa mas inmediato y duradero pa Aruba ta bin di e instabilidad continuo na Venezuela. E rapport ta laga cla cu e situacion politico, economico y humanitario den e pais Sur Americano tin impacto directo riba e islanan ABC.

E relacion tenso entre Venezuela y Reino Hulandes siman pasa a resulta den un cambio den e conseho di biahe pa Venezuela, na nivel cora, loke ta nifica cu ta conseha pa no biaha na Venezuela pa ningun motibo.
Y maske e comunicado di ministerio di Exterior informando di e cambio aki no a duna un motibo pa esaki, e rapport DBSA 2025 si ta duna un indicacion unda e preocupacion ta sinta.

Manera menciona, a pesar cu un confrontacion militar inicia pa Venezuela ta considera como improbable, e rapport si ta resalta e riesgo di escalacion no-intencional pa motibo di e nivel abao di profesionalismo militar na Venezuela. Un escenario asina potencialmente por trata di incidente na frontera of mal comprension, specialmente mirando e cercania di Aruba na e costa Venezolano. E potencial pa mal calculacion ta empeora pa e volatilidad politico sosteni na Venezuela y nan postura regional agresivo.

Mas leu cu e menasa relaciona specificamente cu Venezuela, DBSA 2025 ta duna un evaluacion mas amplio di e vulnerabilidadnan strategico enfrenta pa Aruba. E rapport ta adverti cu e tamaño chikito y capacidad institucional limita ta haci teritorionan manera Aruba specialmente suceptible pa menasanan hibrido. Esaki por inclui atake cibernetico, campaña di desinformacion, of coercion economico di actornan estatal hostil.

E isolacion geografico y infrastructura limita di e parti Caribense di Reino Hulandes ta nifica cu hasta interupcionnan na escala chikito por tin efectonan desproporcionalmente grandi. E realidad aki ta amplifica e importancia di planificacion di resiliencia y coordinacion internacional pa detecta y combati formanan sutil di agresion estatal cu por evadi canalnan militar tradicional.

Complicando e panorama regional ta e hecho cu Venezuela ta profundisando su alineamento cu podernan global cu a keda designa como actornan adversario den e DBSA: Rusia, China y Iran. E rapport ta nota cu Venezuela activamente ta busca cooperacion cu e estadonan aki, algun di cual tin un record di actividadnan hostil contra paisnan di NATO. Mientras cu DBSA no ta sugeri operacionnan militar directo di e actornan aki den Caribe, e ta identifica nan influencia como parti di un tendencia mas amplio di competencia pa poder cu ta manifestando cada bes mas den Hemisferio Occidental.

Reino mester keda alerta na e potencial consecuencianan di e aliansanan aki, specialmente mirando e interes strategico di Venezuela den eherce influencia den su entorno maritimo inmediato. E presencia di actornan di pafo di e hemisferio na Venezuela ta introduci un capa nobo di complehidad y riesgo den e contexto di Caribe, uno cu no por keda ignora den planificacion strategico a largo plaso.

Reconociendo e fragilidad y aumento di importancia strategico di e region, Reino Hulandes ta mantene un presencia militar permanente den Caribe. Esaki no ta solamente destina pa asistencia humanitario y alivio pa calamidad, sino tambe ta fungi como un disuasion visible y creible den un region exponi na menasanan transnacional.

E rapport ta resalta e importancia di capacidadnan di respuesta rapido den Caribe, specialmente den luz di potencial menasa cu por bin di instabilidad regional of accionnan estatal malicioso.

E parti Caribense di Reino no ta simplemente observadornan pasivo di tension geopolitico mas amplio – nan ta zonanan den prome linea unda e responsabilidadnan di Reino pa defensa, stabilidad y proteccion humanitario ta toca otro. Nan ubicacion, nan exposicion na volatilidad regional, y nan vulnerabilidad institucional ta exigi un postura adaptivo pa cu seguridad.