(AP)—Un rapport nobo di e inteligencia Mericano a descubri cu e programa nuclear di Iran a mira solamente un retraso di algun luna despues cu Merca a lansa atake y no tabata “completamente destrui” manera presidente Donald Trump a bisa, segun e dos persona familiar cu e evaluacion.
E rapport emiti pa e Agencia di Inteligencia pa Defensa dialuna ta contradeci declaracionnan for di Trump y prome minister Israeli Benjamin Netanyahu tocante e status di Iran su facilidadnan nuclear. E personanan no tabata autorisa pa adresa e asunto aki publicamente y a papia riba condicion di anonimidad.
Segun e personanan, e rapport a descubri cu mientras e atake diasabra na e sitionan nuclear na Fordo, Natanz y Isfahan a haci daño significante, no a ser totalmente destrui. E evaluacion a descubri cu al menos algun di e uranium enrikeci na Iran a ser transporta for di e sitio prome cu e atakenan di Merca y a sobrevivi, segun e personanan, y tambe a descubri cu e centrifuganan di Iran ainda ta intacto.
Na e planta di enrikece uranium na Fordo, e entrada a cay y infrastructura a haya daño, pues e lo tuma tempo pa reconstrui, pero e infrastructura bao tera no a ser destrui, segun un di e personanan. E persona tambe a bisa cu evaluacionnan anterior a adverti di e resultado aki na Fordo.
E Cas Blanco a critica e evaluacion aki, yamando e “completamente incorecto.”
“E leak di e supuesto evaluacion aki ta un intento pa mina presidente Trump, y descredita e pilotonan cu a conduci un mision perfectamente ehecuta pa destrui Iran su programa nuclear,” secretaria di prensa di e Cas Blanco Karoline Leavitt a bisa den un declaracion. “Tur hende sa kico ta pasa ora bo laga 14 bom di 14.000 kilo cay perfectamente riba nan blanco: destruccion total.”
Trump a bisa den comentarionan y publicacionnan riba red social den e ultimo dianan, incluyendo diamars, cu e atakenan a laga e sitionan na Iran “totalmente destrui” y cu Iran lo nunca reconstrui su facilidad nuclear.
Netanyahu a bisa den un declaracion televisa diamars cu, “Pa decadas mi a priminti bo cu Iran no lo tin arma nuclear y berdad…nos a destrui e programa nuclear di Iran.”
El a bisa cu Merca uniendo cu Israel tabata “historico” y a gradici Trump. E CIA y e Oficina di e Director di Inteligencia Nacional a nenga di comenta riba e evaluacion di DIA. ODNI ta coordina e trabao di e 10 agencia di inteligencia den e pais, incluyendo DIA, cual ta e sector di inteligencia di e Departamento di Defensa, responsable pa produci inteligencia riba ehercitonan stranhero y e capacidad di enemigonan.
E evaluacion di inteligencia a ser reporta pa prome biaha pa CNN diamars.
