For di 1 di februari binidero, Aruba lo tin su prome Coordinador Nacional di maneho di Hoben (Nationale Coördinator Jeugdbeleid). E nombramento aki ta marca un logro importante den e fortalecemento continuo di e maneho di hoben pa futuro y e colaboracion cu partnernan den e sector.
Ministerio di Relacionnan den Reino, Educacion, Hubentud, Innovacion y Deporte ta anuncia cu Raymicheline ‘Misha’ Raymond ta wordo nombra oficialmente como Coordinador Nacional di maneho di Hoben desde 1 di februari binidero.
Den e rol aki, Misha Raymond lo traha di cerca cu organisacionnan, instancianan y partnernan den sector cu tin di haber cu entre otro e cuido, desaroyo y seguridad di hoben. Cu enfoke riba fortalece colaboracion, sostene y desaroya iniciativanan pa hoben y conecta e maneho di hoben cu practica. E lo funciona como punto di contacto pa e sector y contribui na e desaroyo continuo di e maneho di hoben pa futuro di Aruba.
Misha Raymond ta un psicologo GZ cu mas di 10 aña di experiencia cu un specialisacion particular den salud mental di mucha y hoben. Ademas, e tin experencia administrativo como ex-miembro di Parlamento di Aruba. Cu su combinacion di su experticio profesional, experencia como Parlamentario y conocemento di e veld, e ta trece experencia balioso.
E Coordinador Nacional di maneho di Hoben lo concentra riba alinea miho e iniciativanan, proyectonan y actividadnan pa hoben, fortalece comunicacion entre partnernan y sostene accionnan comun, cu e meta pa crea un enfoke mas fuerte y mas coherente pa e bienestar di hoben na Aruba.
Minister Gerlien Croes ta expresa su confiansa den Misha Raymond y ta mira cu entusiasmo pa un colaboracion constructivo cu e sector di hoben, den un comunicado di prensa. “Hunto nos ta traha pa construi un futuro caminda cada hoben na Aruba ta wordo mira, scucha y sosteni.”
