Despues cu resultado di eleccion a keda conoci, Bon Dia a acerca partidonan cu no a logra haya representacion den parlamento pa haya sa nan sentimento tocante e resultado.

Algun partido ta keda optimista y ta sigui traha pa nan futuro den politica, mientras tin lider cu ta tuma nan retiro.

 RAIZ: lo sigui traha pa siguiente eleccion
Ursell Arends, lider di partido Raiz a keda contento cu e acogida cu partido Raiz a haya den un plaso corto. “Den un termino di 3 luna nos a logra haya 2107 voto, cual kiermen cu pa cada luna di campaña nos a haya 702 voto pa luna cu nos a existi. Nos lo sigui traha y mi ta kere pa e proximo eleccion nos lo cosecha kico nos a sembra e biaha aki”.

Apesar cu Raiz no a logra haya asiento den parlamento, sr. Arends ta expresa cu ‘mas importante ta cu nos a haya e respet di e pueblo, y esaki ta un victoria den su mes’. Raiz, cual no a campaña di manera extravagante, tabata parti simia hunto cu nan pamfletanan politico. Ademas por a tuma nota cu durante campaña a organisa varios caminata den Parke Arikok.

“Mi ta kere tambe nos a inspira un poco e politiconan tradicional den esaki, pasobra nos mensahe ta cu e material politico y manera di campaña ta hustamente kico ta dividi e pueblo, algo cu Raiz ta para en contra”. Sr. Arends a expresa cu ‘despues di esaki Raiz ta crece so nos por crece’. “Dialuna mes nos ta cuminsa bek pa prepara pa eleccion venidero y nos ta organisando un evento ya caba pa 2 di december, cual lo probablemente ta un christmas bazaar. E mensahe ta claro desde pueblo y nos lo sigui traha riba nos meta”.

UPP: ta lamenta vota pa populismo
Candelario Booshi Wever, lider di partido UPP di su banda ta expresa cu e ta desapunta cu kico a wordo dicidi pa pueblo 3 dia pasa. “Pueblo a husga pa mas den direccion di fiesta y carnaval cu den direccion di contenido”. Sr. Wever ta lamenta cu e pueblo a ‘vota pa populismo’. Sinembargo sr. Wever ta contento cu esnan cu a vota pa nan partido. “Mi tin speransa cu den futuro Aruba lo realisa cu populismo no ta e solucion pa su problemanan”.

En connexion cu e retiro di Mike Eman como lider di partido AVP, ‘mi tin miedo cu el a haci esaki como un maniobra mahestral, pero alabes ta posibel cu nos partido lo bin cu algo similar’. Si sr. Wever lo sigui den politica, e ta expresa cu UPP lo tene un reunion ainda riba esaki. “Mi no ta sigur ainda, pero nos a cuminsa pensa riba un tipo di mentorship pa mi por transmiti mi experiencia na un persona mas hoben cu lo por drenta e partido como cara fresco”.

PPA: hopi sabiduria pa coalicion
Benny Nisbet di PPA a nenga di duna comentario pasobra ‘nos falta reuni cu e organisacion ainda, pues mi no por bisa nada’. Lider di PPA Kar-Lie NG si a reacciona den un relato: “PPA kier a felicita e partidonan cu a logra haya representacion den parlamento den e eleccion di dia 22 september ultimo. Na esnan cu mester bay forma e gobierno di coalicion cu pueblo a scoge, nos ta desea nan hopi sabiduria pa tuma e decisionnan corecto y cu bienestar general di nos humilde pueblo prevalece como e meta principal. “

E ta continua cu: “Na e pueblo votado cu a eherce nan derecho, nos kier a gradici un y tur cu a tuma e tempo pa tene nos democracia bibo y tambe esnan cu a sostene nos durante campaña y eleccion. Nos kier a gradici tambe tur periodista, colaboradornan, boluntarionan, personal di Censo y Conseho Electoral, cuerpo policial y tur personal di demas medionan di comunicacion y tur otro persona cu di un forma of otro tabata riba pia pa a haci di e eleccion aki, uno exitoso. Danki tambe na UPP y su candidatonan pa a duna nos e oportunidad di uni forsa y presenta un lista combina y pa nan colaboracion durante campaña.”

MAS: no ta sigui mas
Holmo Henriquez lider di partido MAS, a declara cu ‘si mi bisa bo cu nos a keda contento cu e resultado, mi ta gaña bo, naturalmente nos ta desapunta’. Alabes sr. Henriquez ta splica cu ‘e mensahe ta claro desde pueblo cu no kier un cambio, pueblo kier sigui e personanan cu continuamente ta perhudica nos pais’. Loke sr. Henriquez kier enfatisa ta cu ‘e pueblo mester crece un poco y realisa cu partidonan cu no ta trece contenido no tin e miho interes di pueblo na pecho’.

Alabes sr. Henriquez a splica cu e no ta sigui cu su partido . “Esaki ta mi prome y delaster biaha cu un partido nobo”. Bon Dia no a logra haya comentario di partido Curpa.