Durante un conferencia di prensa, Prome Minister Evelyn Wever-Croes a papia tocante e retiro di parlamentario Sue-Ann Ras di partido MEP, relaciona cu e sucedido na Hulanda den reunion di IPKO.
E mandatario a expresa cu como lider di partido MEP, a tuma nota ora cu e Parlamentario a anuncia su retiro. “Mi reaccion naturalmente ta di lamenta, pasobra Sue-Ann Ras a eherce su funcion como Parlamentario cu hopi pasion y dedicacion riba tereno di enseñansa, tereno social y tereno di idioma Papiamento.”
Sinembargo, el a bisa cu ta compronde su decision, agregando cu e ta esun corecto den circunstancianan aki. “Ras a indica cu el a sinti cu el a comete un eror, el a admiti su eror y ta carga responsabilidad pa esey tambe.”
Wever-Croes tambe a bisa cu Ras a demostra integridad, ‘algo cu no ta mira den politico pa hopi tempo’, cual ta algo di admira y respeta, segun e mandatario. Como partido, el a pone su puesto den disponibilidad.
Sinembargo, e mandatario a finalisa cu lo delibera esaki cu partido y mira cua ta e siguiente paso cu tin cu tuma. Pa gobierno e retiro no ta trece impacto, mirando cu e tabata den Parlamento.
“Si e partido no ta acepta e retiro, nan por haci apelacion; tur esey por. Ta prome biaha algo asina ta pasa. Lo mester trat’e cu seriedad, trankilidad y respeta decision.”
