Famia Planea ta comparti cu nan ta para na e di tres edicion, ‘e di tres aña cu ami ta dicidi’. Un proyecto internacional di ‘I decide’, cual ta un campaña di cambio di comportamento pa conscientisa hoben.

Director Evelyn Yarzagaray-Ras a duna di conoce cu nan ta trahando duro den tempo cortico pa por rebrand, cu enfoke riba e contenido y tayer pa scolnan. Esey ta e aspecto primordial di parti di educacion sexual y integral cu ‘ta hopi duro y cla pa start’.

Nan ta start cu ‘Ami ta dicidi’ den carnaval, mirando cu ta temporada cu tin mas libertinahe, persona ta mas vulnerable pa cosnan menos bon y cu e campaña por reforsa e aspectonan mas importante, principalmente na scol.

Famia planea lo sigui keda promove e tayer pa henter e aña, mirando cu ta contento di mira reaccion y a base di esey ta evalua si ta keda cu campaña ‘ami ta dicidi’ of ta cuminsa na 2021 cu un nobo. Pues e duracion di un campaña ta ‘depende acogida y proyecto’.

Manera e campaña di ‘I love my body’ cu tabata riba medionan y a wanta esaki pa 5 aña, cu a trece un cifra sumamente positivo pa nan. Cu ‘Ami ta dicidi’ nan a dicidi menos enfoke riba medionan y mas riba scol y hoben.

Yarzagaray-Ras ta splica cu a hinca mas tempo, energia y aspecto financiero na scol. “Pa e contenido nan a sinti cu a duna bon resultado, implementa locual nos a traha y asina por bin bek cu e mesun campaña pa un aña mas of algo diferente.”

Resultado den proteha nan mes di cantidad of embaraso
E ta splica cu a traha den aspecto preventivo. Nan no por midi, pero nan ta midi e reaccion digital cu nan cifra, e impacto cu nan a haci cu e campaña. Nan ta bay profundo den nan tema dependiendo e educacion, cu nan bay manera scol secundario, basico of educacion special.

Pa e campaña a traha cu IPA, Universidad, International Planned Parenthood. Nan tin un pakete di nivel di educacion basico y secundario, pa motibo cu no tur klas ta traha mescos y mester keda na nivel di cada un.

E ta splica cu ta tuma tempo pa traha y haci e tayer for di cuminsamento, pasobra mester tene na cuenta cu diferente conocemento, nivel di edad, enseñanza y educacion. Ora a bin cu tayer tambe a haya di scolnan basico y educacion special y con ta traha e tipo di formato cu e contenido basa riba edad y conocemento di e mucha of hoben na ken ta duna e tayer.

Tambe Yarzagaray-Ras ta splica con e atencion ta cerca mayornan, bisando cu esey ta keda un reto mirando cu semper ta bay tin e gap di edad cu e grupo di hoben y mucha. Tin ‘otro tipo di mentalidad’ pa cu norma y balor. Pensamento ta haci’e dificil pa yega na otro.

Nan enfoke ta riba e hoben y duna sosten na salud sexual, mayor y educador pa asina yuda e formacion di e hoben. Esey ta locual nan ta haci primordialmente. Mayornan por yega tuma contacto cu nan via medionan social. Nan ta brinda asistencia pa cualkier problema cu tin cu e hoben en cuanto salud sexual y comunicacion.

E ta remarca cu hoben awendia ta mas habri pa papia, pa tende guia y tip. Sinembargo pa mayor no tur ora ta habri y ta compronde e mundo cu e hoben ta aden. Famia Planea ta yuda pa purba drecha e comunicacion.

Den cada situacion ta diferente y nan ta purba adapta nan mes pa esey. Tambe ta haya cu pa scol e docente mester tin un bon relacion cu studiante. Segun Yarzagaray-Ras esey ta un stap di confiansa entre nan, y di e forma ey nan ta habri caminda pa por haya e confiansa cu e mayor.

“Nos tin hopi mayor, pero nan tin historia cu nos of miembro cu nan ta haci servicio pa pas’e over na nan yiu, pero nunca a haci uso di nan servicio. Tin e pensamento di kico ta Famia Planea of kico tur nos ta haci”, e ta splica.

Segun e ta bisa como mayor tampoco ta facil den un comunidad chikito. Nan mester wak strategia y con ta aplica pa nan yiu. Famia Planea lo keda cu enfoke riba hoben y mehora comunicacion di cas cu mayor ‘nos lo keda educa te unda cu nos por’.

E tayer ta entre 40 pa 45 minuut, pa asina empodera e hoben cu nan salud sexual ta den nan man. “Sea ta nan escogencia, ta nan tin cu carga cu responsabilidad cu por ta pa bida largo, sea malesa, embaraso, cualkier otro aspecto cu no ta cay den nos area, ta keda cu e hoben y tin cu carga esaki. E ta keda pa nan tuma un bon decision.”

 

LEAVE A REPLY

Please enter your comment!
Please enter your name here