Fin di juni, Universidad di Aruba a anuncia cu a nombra un rector nobo, Sra. Sue-Anne Lee. Lee tabatin varios aña ta trahando na e universidad, cuminsando su carera academico como docente den e facultad di ‘Hospitality and Tourism Management Studies’ y a sigui crece pa awor tuma un rol importante den liderazgo di e institucion. Den un entrevista cu Bon Dia Aruba, Lee a conta un tiki di su background profesional, su trayecto na Universidad di Aruba y e vision di e universidad bayendo dilanti.
Sue-Anne Lee, naci y lanta na Aruba, a conta cu manera tur hoben el a bay studia na Hulanda y a cuminsa su carera na Aruba den turismo na Aruba Hotel and Tourism Association (AHATA). Na AHATA tambe el a tuma e rol di marketing manager pa e region di Latino America y Europa, y den e departamento di Sales. Lee a splica cu AHATA tabata e “back bone” di su carera den turismo ya cu eynan el a cera conoci cu e mercado y por a siña con importante e ta pa crea un relacion profesional y construi bo ‘network’ pa por logra varios meta. El a splica cu e tambe a siña di e cultura den e sector priva y con pa maneha e mundo di turismo “fast-pacing.” Lee a traha tambe den consultancy yudando varios negoshi desaroya y crece.
Mas despues den su carera, Lee a utilisa su experticio den e sector publico, unda el a traha como consehero di Turismo den e ministerio di Turismo entre juli 2011 y maart 2015. Aki, e rector nobo a splica cu el a traha principalmente den creacion di politica den e areanan di Turismo y Cultura. Esakinan ta inclui politica di air lift y turismo, y un enfoke riba unda Aruba kier bay pa loke ta e sector di Turismo. Tambe a traha pa trece e cultura di Aruba mas cerca di e sector turistico riba e isla, incluyendo cu e desaroyo di San Nicolas.
Trayecto na Universidad di Aruba
Lee su trayecto na Universidad di Aruba a cuminsa na aña 2016. Prome cu esey, el a conta Bon Dia Aruba cu e tabatin conocemento cu e universidad caba, y pa un tempo a acerca e instituto pa comparti su conocemento cu e studiantenan den forma di charla of como docente. Cu esaki Lee tabatin un vision pa no solamente comparti e parti teoretico di su experticio, pero tambe transferi su experencianan den e mercado local na e studiantenan pa asina nan por sa caba con e industria riba e isla ta, cual Lee a enfatisa ta un industria “hopi profesional, fast pacing, cu hopi oportunidad y hopi posibilidad pa innovacion.”
Originalmente, Lee a acerca e instituto pa un rol part-time como docente, pero a encontra un destino nobo ora net e tempo ey un posicion full-time a habri. Lee a bisa cu despues di su experencia trahando den turismo, management y politica, e rol aki tabata un “match” perfecto pa trece su experencia na e universidad. Sinembargo, Lee a splica cu e rol aki a presenta su retonan, specialmente pasobra e ta drentando un otro tipo di ambiente profesional. Lee a admiti cu pa loke ta e parti di enseñanza e proceso tabata un “learning curve”, unda e mester a siña con pa traduci su conocemento den un ambiente academico. Tambe tabatin e trabao di docente cu diferente tarea manera creacion di curriculum, con pa evalua examen y otro tipo di tareanan cu e trabao ta rekeri. Lee a splica cu e mester a tuma e tempo pa siña e aspectonan ey di e trabao.
Un otro reto a presenta ora e pandemia a surgi, unda Lee mester a siña con pa adapta rapidamente con pa duna les pero tambe adapta na e necesidadnan di e studiantenan. Durante e tempo aki, Lee a splica cu el a siña hopi tocante diferente aspecto cu ta funciona of no ta funciona, y con miho pa stimula desaroyo di studiantenan den e mercado di Turismo.
Na 2021, e decano di e facultad a dicidi di retira y Lee a mira esaki como un oportunidad pa siña mas di e operacion di e universidad na un nivel mas halto. E rector a splica cu e tempo ey, e rol aki tabata un experencia “eye-opening” unda e por a siña tocante e organisacion di e instituto y alabes crece como lider dentro di e universidad.
E experencianan aki a hib’e leu dentro di e organismo academico, y na 2023, despues cu e rector e tempo ey a retira, Lee a traha conhuntamente cu otro decanonan pa tene un continuidad di operacion. Eventualmente, el a postula su mes hunto cu un colega como rector interino.
Y e aña aki, Lee a ser nombra como e rector nobo di Universidad di Aruba.
Vision y plan di strategia
Lee a splica cu como instituto academico, Universidad di Aruba tin e vision pa trece comunidad y e universidad mas cerca di otro. E motibo principal pa esaki, manera a splica, tabata pa stimula studiantenan pa traha back den e mercado Arubano y asina duna back na nos pais.
Lee a enfatisa cu e vision tin como mensahe cu e universidad no ta solamente pa e elite sino cu e ta pa tur hende. Pues cu e meta aki den mente, Lee a splica cu e universidad lo dedica mas tempo den inverti den studiantenan y recursonan local. Tambe a enfatisa cu e instituto lo contribui back na nos comunidad, sea cu investigacion of otro tipo di experticio of plataforma cu por brinda nos comunidad un espacio pa siña.
Tambe a subraya e importancia di stimula cultura y herencia den studiantenan, di e manera aki sigui cera e distancia entre comunidad y e universidad. Lee a conta cu den e ultimo añanan a cuminsa algun cambio den e curriculum, adaptando den cursonan mas ainda e contexto local. Por ehempel, den e curriculum a introduci Papiamento den loke ta e seccion di cultura y herencia den varios curso, pa asina subraya e importancia di pakico e ta un herment clave den e area profesional. Y tambe pa stimula conexion entre studiantenan y nan cultura, herencia y comunidad.
Den un ambiente profesional unda frecuentemente ta pidi pa mehora bo mes profesionalmente, Lee a splica cu hopi hende sa opta pa bay afo pero e universidad kier brinda e plataforma ey na nos profesionalnan, asina sigurando cu e mehoracion profesional por tuma luga tambe den un contexto local.
Otro parti di e vision ta impacto, Lee ta conta. Den e parti di educacion, Lee ta menciona cu un punto di consideracion tabata con e universidad por contribui pa trece e contexto di Aruba den diferente sector riba e isla, sea den e sector priva of publico. Actualmente e instituto tin diferente partnership pa yega na e vision aki di e universidad, unda UA tambe lo ofrece su conocemento den diferente area den nos comunidad.
Pa cumpli cu e vision, e rector a sigura cu actualmente ta trahando riba un plan strategico hunto cu un compania externo como facilitador. E rector a splica cu e equipo ta trahando riba un strategia di maneho unda tur hende por contribui pa asina por tin un vision conhunto y cla. Na e momento aki a splica cu ya tin algun implementacion chikito pero cu e pasonan grandi lo tuma luga despues cu finalisa e plan.
“E importante ta pa traha cu hende, sea ta lectornan of studiantenan. Esaki ta e forsa di un universidad.”
